city axpris 2

दक्षिण सुडानय् शान्ति मिसनया क्याम्पय् आक्रमण, नेपाली टोली सकुशल

नेवा: अनलाइन न्युज – ललेन्द्र शाक्य | २०८० माघ १५, सोमबार १२:०४:०९

दक्षिण सुडानया अबेई क्षेत्रय् हतियारधारी पुचलं आक्रमण याःबलय् संयुक्त राष्ट्रसंघया शान्ति मिसनया छम्ह दुजःलिसें ५२ म्ह सर्वसाधारण सीगु दुसा मेपिं ६४ म्ह घाःपाः जूगु दु ।

बन्दुकधारीया पुचलं २७ जनवरी शनिवाःया दिं श्रृंखलाबद्ध आक्रमण याःगु खः । न्यिनकु आक, मजबोङ व खादियन क्षेत्रय् साम्प्रदायिक हिंसा जूगु खः । हतियारधारी पुचलं अगोकय् च्वंगु संयुक्त राष्ट्रसंघया अन्तरिम सुरक्षा बलया क्याम्पय् तकं आक्रमण याःगु खः । उगु आक्रमणय् लानाः ५२ म्ह सीगु बुखँ एजेन्सी एपीं जानकारी ब्यूगु दु ।

अबेईया नितिं संयुक्त राष्ट्रसंघया अन्तरिम सुरक्षा बलं नं बन्दुकधारीया आक्रमणं शान्ति मिसनय् खटेजूम्ह घानाया छम्ह दुजः सीगु पुष्टि याःगु दु ।

संयुक्त राष्ट्रसंघया अन्तरिम सुरक्षा बलं सार्वजनिक याःगु विज्ञप्तिइ न्ह्यथनातःगु दु, “उगु आक्रमणयात शान्ति सैनिकया टोलीं विफल याःगु खः । तर दुःखया कथं धायेमाःगु दु आक्रमणय् लानाः शान्ति मिसनय् खटेजूम्ह घानाया छम्ह सैनिक सीगु दु ।” वं आक्रमणया निन्दा नं याःगु दु ।

तेल भण्डार दूगु अबेईयात सुडान व दक्षिण सुडान निगुलिं पाखें दाबी यासें वयाच्वंगु दु । तर उगु क्षेत्र आः दक्षिण सुडानया नियन्त्रणय् दु । स्थानीय अधिकारीया कथं शनिवाः सनिलया ४ः४५ ता इलय् बन्दुकधारी पुचलं आक्रमण याःगु खः । आक्रमणया हुनि सीमदुनि । तर भूमि विवादया हुनिं हे आक्रमण जूगु अनुमान याःगु दु ।

साम्प्रदायिक दंगा जुयाच्वनीगु अबेई क्षेत्रय् नेपाली शान्ति सैनिकया ९७ म्हेसिगु टोली नं खटेजूगु दु । तर नेपाली टोली सुरक्षित जूगु नेपाली सेनाया प्रवक्ता कृष्णप्रसाद भण्डारीं जानकारी ब्यूगु दु ।

प्रवक्ता भण्डारीं धाःगु दु, “आक्रमणय् घानाया छम्ह दुजः सीगु जानकारीइ वःगु दु । नेपाली टोली धाःसा सुरक्षित दु ।”

अबेई क्षेत्रय् जातीय हिंसा सामान्यथें हे जुयाच्वंगु दु । अनया आदिवासी समुदायदथुइ भूमि विवाद नं दु । उगु क्षेत्रय् बहुसंख्यक नगोकडिंया समुदायं दक्षिण सुडानया पक्ष कयाच्वंगु दुसा मिसेरिया खानाबदोश समुदायं सुडानया पक्ष कयाच्वंगु दु । उकिं अन इलय् ब्यलय् हिंसा जुयाच्वनीगु खः ।

अफ्रिकी संघं अबेईया विवाद क्वचायेकेत जनमत संग्रहया प्रस्ताव याःगु खः । मतदानय् सहभागिताया विषयस सहमति मजुइधुंकाः लिपा लिच्वः पिहाँ वःगु मदुनि ।

वंगु दँ मार्चय् संयुक्त राष्ट्रसंघं अबेई क्षेत्रय् शान्ति सैनिक तैनाथ याःगु खः । वधुंकाः नं साम्प्रदायिक हिंसा द्यूगु मदुनि ।
सन् २०२३ स नं उगु क्षेत्रय् आक्रमण जूबलय् ३२ म्ह मनूत सीगु खः ।

Categorized in अन्तर्राष्ट्रिय