coved ad

दक्षिण एसियाया न्यागू मुलुकय् ओमिक्रोन दुहाँ वल

नेवा: अनलाइन न्युज – ललेन्द्र शाक्य | २०७८ मङ्सिर २३, बिहिबार १२:४४:५३

पाकिस्तानय् तकं न्हूगु कोभिड भेरियन्टया संक्रमित लुयावःगु दु । थ्वलिसें दक्षिण एसियाया न्यागू मुलुकय् ओमिक्रोन भेरियन्ट खनेदूगु दु ।

बिहिवाः कराचीया छम्ह मिसायाके ओमिक्रोन भेरियन्ट संक्रमण पुष्टि जूगु पाकिस्तानया अधिकारीपिन्सं धाःगु दु । संक्रमि मिसा स्थानीय जूगु व विदेश यात्रा याःगु खनेमदुगु नं अधिकारीपिन्सं धाःगु दु ।

खोप मकाःनिम्ह ६५ दँया मिसायाके ओमिक्रोन संक्रमण खनेदूगु खः । संक्रमण खनेदयेधुंकाः उम्ह मिसा अस्पताल भर्ना जूगु व आ डिस्चार्ज जुयाः उम्ह मिसा छेँय् हे आइसोलेसनय् च्वनाच्वंगु दु ।

लिपांगुखुसि पाकिस्तानय् ओमिक्रोन लुयावयेधुंकाः आःतक दक्षिण एसियाया न्यागू मुलुकय् थ्व भेरियन्ट ब्वलंगु दु ।

संक्रमितमध्ये दकले अप्वः भारतय् दु । अन ओमिक्रोनपाखें २० म्हसिबें अप्वः मनूत संक्रमित जुइधुंकूगु दु । श्रीलंका व माल्दिभ्सय् तकं थ्व भेरियन्ट ब्वलनेधुंकूगु दु ।

नेपालय् तकं ओमिक्रोनया संक्रमित पुष्टि जुइधुंकूगु दु । दक्षिण अफ्रिकापाखें मंसीर ३ गते नेपाः दुहाँ वःम्ह ६६ दँया विदेशी नागरिक व वया सम्पर्कय् वःम्ह ७१ दँया नेपाली नागरिकयाके सोमवाः संक्रमण पुष्टि जूगु खः ।

विश्व स्वास्थ्य संगठनया कथं आःतक ५७ मुलुकय् ओमिक्रोन ब्वलंगु दु ।

Categorized in अन्तर्राष्ट्रिय