coved ad

दक्षिण अफ्रिकाय् लुयावल कोभिड १९ या न्हूगु भेरियन्ट

नेवा: अनलाइन न्युज – ललेन्द्र शाक्य | २०७८ मङ्सिर १०, शुक्रबार १०:४८:१९

दक्षिण अफ्रिकाय् कोभिड १९ या न्हूगु भेरियन्ट लुयावःगु दु । आःतक म्हो जक मनूतय्त संक्रमित याःगु कोभिड १९ या न्हूगु भेरियन्ट लुयावःगु अन्तर्राष्ट्रिय समाचार माध्यमं जानकारी ब्यूगु दु ।

न्हूगु भेरियन्ट लुयावयेधुंकाः वैज्ञानिकपिन्सं चिन्ता प्वंकूसें थुकिं ब्वलनेफूगु जोखिम थुइकेगु कुतः जुयाच्वंगु धाःगु दु ।

‘बि १.१.५२९’ नामाकरण याःगु उगु भेरियन्टय् तःक्वःमछि छगू हे कथंया म्युटेशन जुइगु ‘मात्रा अस्वभाविक’ जूगु अलजजिरां धाःगु दु । बिहिवाः वैज्ञानिकपिन्सं म्युटेशनया ‘अस्वभाविक मात्रा’या हुनिं न्हूगु भेरियन्टं म्हगलय् रोगप्रतिरोधी क्षमता छलेयाये फइगु व थप संक्रामक जुइफूगु जुयाः चिन्ता प्वंकूगु दु ।

दक्षिण अफ्रिकाया सरुवा ल्वय्या नितिं राष्ट्रिय इन्स्टिच्युटया कथं जिनोमिक सिक्वेन्सिड लिपा २२ म्ह मनूतय्के न्हूगु भेरियन्ट लुयावःगु खः ।

‘दुःखया लिसें धायेमाः जिमिसं लुयावःगु न्हूगु भेरियन्ट दक्षिण अफ्रिकाय् चिन्ताया विषय जूगु दु’, नेटवर्क फर जिनोमिक सर्भिलेन्सया टुलियो डि ओलिभियरां धाःगु दु । न्हूगु भेरियन्टलिसे म्युटेशनया क्षमता अतिकं उच्च जूगु व थुकिया हे हुनिं हाकनं संक्रमण खनेदूगु नं वं धाःगु दु ।

ओलिभियराया कथं बोत्स्वाना व हङकङय् तकं कोरोनाया न्हूगु भेरियन्ट लुयावःगु दु । अन दक्षिण अफ्रिकापाखें वःपिं मनूत थुकिं संक्रमित जूगु दु ।

वइगु छुं दिं दुने हे न्हूगु भेरियन्ट गुलि संक्रामक व गम्भीर जू धकाः तय यायेगु अधिकारीपिन्सं धाःगु दु । आःतक खासयानाः ल्यायम्ह ल्यासेपिंके ‘बि.१.१.५२९’ ब्वलनाच्वंगु दु ।

Categorized in अन्तर्राष्ट्रिय