1142 nhoo dan adv

दकलय् ल्यूने लाःम्ह न्हाप जुइगु मोटरसाइकल रेस !

२०७२ आषाढ २७, आइतबार ०८:००:१३

स्पीडं ब्वाँय् वना मोटरसाइकल रेसय् सुनां याकनं दूरी पूवंकल व न्हाप जुइ । दकलय् ल्यूने लाःम्हेसितं सुनां वास्ता याइमखु । तर नेपालय् छगू उज्वःगु मोटरसाइकलया रेस जुल गुकिइ दकलय् ल्यूने लाःम्हेसित न्हाप भाःपियाः सिरपा नं बिल । दाङया घोराहीइ बुलुहुँ मोटरसाइकल ब्वाकेगु कासा जूगु दु ।

तच्वकं ब्वाकाः मोटरसाइकल गयेवं दुर्घटना जुइगु धासें जिल्ला प्रहरी कार्यालय दाङ व सामुदायिक प्रहरी सेवा केन्द्रया मंकाः ग्वसालय् म्हिगः शनिवाः दाङय् बुलुहुँ मोटरसाइकल ब्वाकेगु धें धें बल्ला हे जुल ।

घोराहीया भरतपुर मैदानय् जूगु उगु कासाय् तुलसीपुरया अरुण योगी न्हाप लात । योगीं ५० मिटरया दूरी २ मिनेट ९ सेकेण्डय् क्वचायेकूगु खः । योगी दकलय् ल्यूने लाःम्ह खः ।

अथेहे १ मिनेट २६ सेकेण्डय् उगु दूरी पार यानाः श्रीधर केसी निगूगु थासय् लाःगु दुसा १ मिनेट २५ सेकेण्डय् दूरी पूवंकाः नवीन जिएम स्वंगूगु थासय् लात ।

धेंधेंबल्लास ५२ गः मोटरसाइकलं ब्वति काःगु खः ।