nepal investment baink

थ्व हे चक्र चाःहुलाच्वनी, बस् !

देशय् वःगु विभत्सकारी भूकम्प प्राकृतिक दुर्घटना जक मखु । थ्वं अनेकपक्षीय तरंग नं थनाबी । विपदया थ्व घडीइ मनूत सम्वेदनशील जुइ । स्वाभाविक खः । तर विपदं मनूतय् नुगलय् अव्यक्त रुपय् थानाच्वंगु आक्रोश, असन्तोषया नं विस्फोट यानाबी । दमित पीडा, व्यथायात पिल्ह्वया बी ।

महाभूकम्प जुइवं देशया सैनिक, पुलिस, सपूत नागरिकत पीडिततय् उद्धारया ज्याय् पिहां वइ । संकटया घडीइ नेपाली जनता ऐक्यबद्ध जुइफु धइगु विश्वास थौं ज्वलन्त जुइ । तर विपदया सुरुवातय् नेपाली जनतां राजनीतिक नेतातप्रति अत्यन्त आक्रोश प्वंकी । अनेक सामाजिक सञ्जालमार्फत् राजनीतिक नेतातप्रति यक्वस्यां वितृष्णा प्रकट याइ । ज्यूगु, मज्यूगु खँग्वःत छ्यलाः राजनीतिक व्यक्तित्वतयत ब्वः बी । मत्तिइ मुंगु खँ नं धायेत बाँकी तइमखु ।

देशया राजनेतात प्रति वःगु थ्व वितृष्णा, वैराग्य ठीक जू मजू, यकिन यानाः धाये फइमखु । ठीक जू, मजू  थ्व इलं क्यनी । थुज्वःगु संकटया घडीइ देशया नेतात जनताया लागि तःधंगु साहस, ढाडसया लिधंसा जुइमाःगु खः । तर अःखः छाय् जनतां राजनीतिक नेतातप्रति अविश्वास प्वंकी । थ्व गम्भीर प्रश्न जुइ । महाभूकम्प न्ह्यःया राजनीतिक अन्योलतां देशय् राजनीतिक नेतातप्रति गुगु आस्था भंग यानाबिल शायद उकिया हे थ्व लिच्वःजुइमाः । थौं देश अकल्पनीय विपदया घडीइ लानाच्वंगु दु । सामान्य स्थितिइ हे देशय् सामान्य नेतृत्व बीमफुपिं नेतातसें थौंया छताछुल्य, विखण्डित स्थितिइ देशयात गथे सम्हाले याइगु खः ? जनता चिन्तित जुइ । निराश जुइ । थुज्वःगु हे चिन्ता, निराशा नेतातप्रतिया असहिष्णुता अनियन्त्रित जुइ । विस्फोट जुइ ।

राजनीतिक नेतातप्रति पिहांवःगु आक्रोश, आक्षेपं देशया नेतातय् ध्यान साली । इमिसं थःगु कथं हे अर्थ छ्याइ । प्रतिक्रियावादीतसें संकटया अवसर छ्यलाः देशया राजनीतिक नेता वर्गप्रति सुनियोजित षड्यन्त्र जुयाच्वंगु नं तायेकी । प्रमुख दलतय् नेतातसें थुज्वःगु षड्यन्त्रप्रति होशियार जुइमाः । सतर्क याइ ।

तर छता खँ पक्का । देशय् छुं दँ न्ह्यवनिसें खने दयाच्वंगु राजनीतिक अन्यौलता, नेतातय् अकर्मण्यतां देश झं झं अनिश्चितताया ध्याकुनय् लाःवनी । देशय् वःगु ह्यूपाः, क्रान्तिं देशया ख्वाःपाः हिली । न्हूगु नेपाः स्वयेदइ धइगु विश्वास फुक्क चकनाचुर जुइ । अधिकांश जनतायाके थौं राजनीतिक नेतृत्वप्रति अनास्था खनेदइ । संविधान दयेकेगु नामय् भाँडभैलो जुइ । महाभूकम्प जुइ । राजनीतिक नेतातय् सोह्रय् सालां सत्र जुइ । आः संविधान दयेकेत कपाः स्याके म्वाःल । मंकाः सरकार दयेकाः भागबण्डा यानाः नये छिनी । ह्वःताया आशा याइ ।

थौं नेतातसें इपिंप्रति असन्तुष्ट जूपिंत देशद्रोही, षड्यन्त्रकारी खंकी । थःपिं प्रति प्वंकूगु अविश्वासयात कटु शब्दं प्रतिवाद याइ । तर थौंया घडीइ देशयात माया याइपिं इमान्दार मनूत देशया राजनेतात खनाः दुःखित । नेतात प्रति थौं विश्वासया संकट दु । देशयात आः सम्हाले याइम्ह सु ? थ्व न्ह्यसलं जनता चिन्तित जुइ । देशय् वःगु थांैया संकटया घडिइ राष्ट्रिय सरकार माः । थीथी पार्टीया नेतातसें वकालत याइ । खः देशय् राष्ट्रिय सरकार माः । तर भागबण्डां राज्य संंचालन यायेगु ई थौं मखु । फुक्क विभेदयात छखे तयाः देशयात हाँके यायेमाःगु ई खः थौं । तर थुज्वःगु आवश्यकता चूलाकेत सबल, दक्ष, योग्य, सबल नेतृत्व माः । थौं खनेदुपिं नेतातपाखें थ्व आवश्यकता पूवनी मखु । प्रत्येक नेतात प्रधानमन्त्री जुइधुंकूपिं । इमिगु शासनकाल जनतां भोगे याये धुंकल । इपिं सु, गुज्वःपिं जनतां लने धुंकल । इलय् ब्यलय् सरकार हाँके याःपिं नेतातय् अकर्मण्यतां, मनोमानी ढंगया सहरीकरण जुइ । थुकिया दुष्परिणाम थौं देश, जनतां फयेमाली ।

देश थौं प्रलयया स्थितिइ । थौं पुनःनिर्माण  यायेगु तःधंगु चुनौती दु । पुनस्र्थापनाया प्रश्न उलि हे जटिल । देश सामान्य स्थितिइ वयेत हे दंदँ काइ तिनि । दू्रत विकासया चरणय् देश गुबले प्रवेश याइगु खः ? व ला गन गनया खँ तिनि ।

महाभूकम्प थौं विनाशया कारण जुइ । तर थ्वैत आः नवनिर्माणया अवसर कथं छ्यलेफुसा नेपाः अभूतपूर्व विकासया लँय् न्ह्याः वनेफु । महाभूकम्पयात थौं महान् क्रान्तिया वाहकया रुपय् जनताय् चेतना थनेफयेकेमाः । देशय् जनचेतनाया जग मजबुत यायेगु ई थ्व संकटया घडी जुइ । दुःखं मनूतय्त ज्ञानी याइ । इमि चेतनास्तर मजबुत यानाबी । न्ह्याकी । हानं भ्रष्टाचार, दूराचार, नवनिर्माणया जगयात प्रभावित याइगु खःसा, देश दुर्बल जुइ । थ्व हानं हानं तासया छेँ थें गल्र्याम गुर्लम जुइ । देशय् गुलिखे विनाश जुइ उकिया ल्यूने अनेक भ्रष्टाचार, दूराचारया कारणत नं दइ । उकिया नं हिसाब किताब पुइकेमाः ।

आःया संकटया घडीइ मजबुत, प्रतिबद्ध, इमान्दार सरकार मदयेकं छुं नं जुइ फइमखु । आमजनता, थीथी स्वतन्त्र प्रतिबद्ध संस्थातसें सरकारया प्रत्येक ज्याखँय् निगरानी तयेमाः । पुलां खुँतपाखें छुं नं जुइफइमखु । न्हूगु नेतृत्व माः । नवनिर्माणया अवसर हानं हानं वयाच्वनीमखु । वःगु इलय् थुकियात सुथां लाकेमाः । नत्र नां जकया निर्माण जुइ । हानं भुखाय् ब्वइ । फुक्क दुनी । थ्व हे चक्र चाःहुलाच्वनी । बस् ।

–०–