nepal life 2076 3 18

थ्री स्टार क्लब भवन निर्माणया नितिं यलया १६ वडापाखें २५ लख ग्वाहालि

नेवा: अनलाइन न्युज – ललेन्द्र शाक्य | २०७८ श्रावण २०, बुधबार ११:०६:३०

नेपाःया खेलकुद विकासय् क्रियाशील जुयाच्वंगु संस्था थ्री स्टार क्लबया भवन निर्माणया नितिं यल महानगरपालिका १६ वडापाखें २५ लख तका दां विनियोजित याःगु दु ।

मंगलवाः छगू ज्याझ्वःया दथुइ यल महानगरपालिका १६ वडाया वडा नायः निर्मलरत्न शाक्यं क्लबया नायः अरुणमान जोशीयात न्हापांगु किस्ता कथं आःयात ९ लख तका दांया चेक लःल्हानादीगु खः ।

यलया मंगलबजारय् च्वंगु थ्यंमथ्यं ७ आना जग्गाय् उगु क्लबया भवन दयेकेत्यंगु खः । उगु चेक लःल्हायेगु ज्याझ्वलय् १६ वडाया वडा नायः निर्मलरत्न शाक्यं मुलुकया खेलकुद विकासय् क्लबया योगदान महत्वपूर्ण जूसां नं स्रोत साधनया अभावं आःतक क्लब भवन दयेके मफयाच्वंगु स्थितियात ध्यानय् तयाः भवन निर्माणया नितिं उगु रकम ग्वाहालि यायेत्यनागु जानकारी बियादीगु खः ।

वंगु आर्थिक दँया बजेटपाखें उगु रकम ग्वाहालि यानागु धासें वडाध्यक्ष शाक्यं निर्माण ज्या सुरु जुइधुंकाः ल्यंदूगु ४० प्रतिशत रकम लःल्हायेगु नं जानकारी बियादिल । 

रकमया हुनिं भवन निर्माण ज्या दिकेमज्यूगु धासें वडाध्यक्ष शाक्यं भवनया नितिं चालू आर्थिक दँय् थप १० लख तका दां विनियोजित यानागु धयादिल । 

उगु चेक लःल्हायेगु ज्याझ्वलय् थःपिनिगु क्लबया दुःख पीर व व्यथा थुइकाः भवन निर्माणया नितिं आर्थिक ग्वाहालि याःगु धासें वडाध्यक्ष निर्मलरत्न शाक्यया अग्रसरतायात क्लबया नायः जोशीं च्वछायादीगु खः ।

Categorized in कासा