1142 nhoo dan adv

थ्रीडि प्रिन्टिङ्ग याइगु मेसिन

२०७२ बैशाख २८, सोमबार ०८:३१:२५

थ्रीडी प्रिन्टिंग बारे आः नं आपाः मनूतयसं बांलाक मस्यू । झीसं थःगु किपा कयाः उकियात टुडी प्रिन्टिंग ला याये तसकं अःपु, तर थ्रीडी प्रिन्टिंग यायेत धाःसा विशेष कथंया स्क्यानिंग मेसिन माली ।

अमेरिकाया फिजिकल सोसाइटीं यानाच्वंगु ‘इण्डष्ट्री डे’ नांया सम्मेलनय् आः थ्रीडी प्रिन्टिङ्ग मेसिन तयाः मनूतयगु हे थ्रीडि छापा पिकयाः क्यनाच्वंगु दु । थःगु थ्रीडि प्रिन्ट पिकायेगु निंतिं मेसिन न्ह्यःनेया छगू प्लेटफर्मय् दनेमाः । अले उकिया न्ह्यःने च्वंगु विशेष मेसिनं छिगु च्वंनिसें क्वथ्यंक स्क्यान याइ । स्क्यानलिपा छितः छिगु प्रिन्ट जुइगु किपाया प्रिभ्यू नं क्यनी । स्क्यान यायेधुंकाः उगु डाटायात कम्पनीं थःगु मुख्यालयया सिस्टमय् लोड यानाः छवाःया ई बिइ । छवाः लिपा छिं थःगु ‘जुम्ल्याहा’ थ्रीडिइ प्रिन्ट जूगु डमी कायेखनि ।



‘ट्विनडम’ नांया कम्पनीं तःगु उगु थ्रीडि प्रिन्टिङ्ग सिस्टमपाखें मनूतयसं थःगु ‘जुम्ल्याहा’ प्रिन्ट यायेफइ । कम्पनीया छम्ह अधिकारीया कथं थुगु प्रविधियात अझ विकसित याये ल्यं दनि । थौंकन्हय् थुगु मेसिनं मनूया प्राकृतिक रंग पूवंक स्क्यान यायेमफुनि । तर थुकिया थ्रीडि प्रिन्ट चीधं जुइगुलिं थ्व कमजोरी धाःसा आः खंके फइमखु ।

थ्रीडी स्क्यानिङ्ग थुगु मेसिनयात ‘ट्विन्सटेन्ट’ नां बियातःगु दु । थुकिया मू ६० द्वः अमेरिकी डलर थ्यं । थुकियात अमेरिकालिसें अष्ट्रेलिया वा जापानया आपालं कम्पनीं न्यानाः यंकेधुंकूगु दु । तर थुगु प्रिन्टिङ्गया बजाः तःधं मजूनि । कम्पनीया कथं मनूतयसं थःगु थ्रीडि प्रिन्टिङ्ग यायेगु सिबें थम्हं लहिनातयापिं जनावरतय् थ्रीडि प्रिन्टिङ्ग यानाः उकियात थःनापं तयेगु यायेफइ ।

– एजेन्सीपाखें