ब्रेकिंग

  • निषेधाज्ञा ::: स्वनिगलय् श्रावण २७ गतेतक निषेधाज्ञा थप ।
zero media family planning adv

थौं ३९ क्वःगु वीपी स्मृति दिवस

नेवा: अनलाइन न्युज – ललेन्द्र शाक्य | २०७८ श्रावण ६, बुधबार ११:१४:५८

थौं बुधवाः ३९ क्वःगु वीपी स्मृति दिवस । नेपाःया न्हापांम्ह जननिर्वाचित प्रधानमन्त्री विश्वेश्वरप्रसाद कोइरालाया योगदानया लुमन्तिइ ३९ क्वःगु स्मृति दिवस देय् न्यंकं थीथी ज्याझ्वः यानाः न्यायेकूगु दु ।

नेपालय् प्रजातन्त्रया स्थापनाया नितिं संघर्ष याःम्ह कोइराला वि.सं. २०३९ साउन ६ गते मदुगु खः । वीपीं नेपाली साहित्यया क्षेत्रय् नं आपालं महत्वं जाःगु योगदान याःगु दु ।

कोइराला बि.सं. १९७१ भाद्र २४ गते जूगु खः । वि.सं. २०१५ या संसदीय निर्वाचनलिपा २०१६ जेठय् वीपी कोइराला न्हापांम्ह जननिर्वाचिन प्रधानमन्त्री जूगु खः ।

नेपाली साहित्यय् मनोवैज्ञानिक यथार्थवादी धाराया प्रवर्तक कोइरालाया डेढ र्दन कृति पिदंगु दु । कोइरालाया ‘तीन घुम्ती, मोदी आइन, हिटलर र यहुदी, सुम्निमा, नरेन्द्रदाइ व बाबु आमा र छोरा’ यानाः खुगू उपन्यास पिदंगु दु । अथेहे, निगू बाखं मुना ‘श्वेत भैरवी’ व ‘दोषी चश्मा’ पिदंगु दुसा हरिप्रसाद शर्माया सम्पादनय् ‘विश्वेश्वरप्रसाद कोइरालाका कथा र कविता’ पिदंगु दु ।

सुन्दरीजल बन्दीगृहय् च्वंगु ईया दैनिकीइ आधारित ‘जेल जर्नल’, वि.सं. २०३३ पुष १६ गते राष्ट्रिय एकता व मेलमिलापया नीति कयाः स्वदेश लिहाँ वयेधुंकाः त्रिभुवन अन्तर्राष्ट्रिय विमानस्थलपाखें तप्यंक सुन्दरीजल बन्दीगृहय् यंकेधुंकाः च्वयातःगु दैनिकी ‘फेरि सुन्दरीजलं’ नेपाःया तत्कालीन राजनीतिक अवस्थाया यथार्थ चित्रण याःगु दु ।

ज्ञाननिष्ठ ज्ञवालीया सम्पादनय् पिदंगु सिसार पत्रिकाय् ‘साहित्यमा प्रगतिशीलता’ विषयस कोइरालाया निबन्ध लिसें रचना नं पिदंगु दु । जीवनया ताःहाकःगु ईतक कांग्रेसया नेतृत्व यानाः वि.सं. २०१५ सालया आमनिर्वाचनय् पार्टीं दुईतिहाइ बहुमत प्राप्त यायेधुंकाः न्हापांम्ह जननिर्वाचित प्रधानमन्त्री जूम्ह कोइरालां नेपालय् राष्ट्रियता, प्रजातन्त्र व समाजवाद पलिस्थाया नितिं राजनीतिक नेतृत्व बिल । प्रधानमन्त्रीत्वकालय् कोइरालां बिर्ता उन्मूलन व जग्गा जोतेयाःम्हेसिगु जुइमा धैगु भूमिसुधार ज्याझ्वः न्ह्यःने हःगु खः ।

वि.सं. २०१७ पुष १ गते शाही नेपाली सेनाया शक्तिया भरय् जननिर्वाचित सरकार अपदस्थ यायेधुंकाः कोइराला लिसेंया नेतापिन्त सिंहदरबारय् बन्दी याःगु खः । लच्छि लिपा सेनाया सुन्दरीजल आर्सनलया प्रमुखया सरकारी निवासयात जवंखवं पःखालं घेरेयानाः नेता कोइराला, संसदया न्हापांम्ह सभामुख कृष्णप्रसाद भट्टराई, नेता गणेशमान सिंह लिसेंया मन्त्रीपिन्त सुन्दरीजल बन्दीगृहय् बन्दी याःगु खः ।

वि.सं. २०२५ सालय् स्वास्थ्य परीक्षणया नितिं जेलमुक्त जूम्ह कोइरालां च्यादँतक भारतय् निर्वासित जीवन फुकल । भारतय् निर्वासित जुयाः प्रजातन्त्र पुनःस्थापनाया पक्षय् संघर्ष यानाच्वंगु इलय् राष्ट्रियता कमजोर जूगु विश्लेषण यानाः च्यागू ज्यान मुद्दाया पर्वाह मयाःसे वि.सं. २०३३ पुष १६ गते राष्ट्रिय एकता व मेलमिलापया नीति ज्वनाः कोइराला स्वदेश लिहाँ वःगु खः । कोइरालां छ्यःगु मेलमिलापया नीति थौं नं मुलुकया राजनीतिइ उलि हे सान्दर्भिक जुयाच्वंगु दु ।

प्रजातान्त्रिक समाजवादया चिन्तक व प्रयोक्ता कोइरालां स्वतन्त्र रुपं चिन्तन, आयाम, परम्परा व शैली बियाः साहित्यया माध्यमं नेपाली वाङ्मययात शिखरय् थ्यंकेत योगदान बिल ।

न्हापांम्ह जननिर्वाचित सरकारया प्रधानमन्त्री, संसदया सभामुख व मन्त्रीपिन्त बन्दी याःगु सुन्दरीजल बन्दीगृहयात वि.सं. २०६१ भाद्र २४ गते वीपी संग्रहालयया रुपं उलेज्या याःगु खः । वीपीया जीवनया महत्वं जाःगु जीजबीजया संकलन यानाः दर्शनीय दयेकूगु उगु संग्रहालय २०७२ बैशा १२ गतेया तःभुखाचं क्षतिग्रस्त जुयाः आः पुनःनिर्माणया ज्या लिपांगु चरणय् थ्यंगु दु ।

संग्रहालयस वीपीया जीव्नया महत्वं जाःगु हलंज्वलंया लिसें वि.सं. २००७ या क्रान्तिइ छ्यःगु ट्यांकर, कांग्रेसं वि.सं. २०२९ स क्रान्तियात खर्च मुंकेत अपहरण याःगु नेपाली वायु सेवा निगमया विमान नं तयातःगु दु ।

Categorized in राजनीति