prabhu baink new

थौं संविधान दिवस, तिंख्यलय् ज्याझ्वः

नेवा: अनलाइन न्युज – ललेन्द्र शाक्य | २०७७ आश्विन ३, शनिबार १३:३०:०२

थौं खुक्वःगु संविधान दिवस न्यायेकाच्वंगु दु । २०७२ असोज ३ गते संविधान सभापाखें संघीयता लिसेंया नेपाःया संविधान जारी जूगु दिंया लुमन्ति यासें संविधान दिवसयात राष्ट्रिय दिवसया रुपं न्यायेकेगु यानाः वयाच्वंगु खः ।

दिवसया लसताय् तिंख्यःया सैनिक मञ्चय् चीहाकःगु विशेष समारोह ज्याझ्वः जुयाच्वंगु दु ।

उगु विशेष ज्याझ्वलय् राष्ट्रपनि विद्यादेवी भण्डारी, उपराष्ट्रपति नन्दबहादुर पुन, प्रधानमन्त्री केपी शर्मा ओली, प्रधानन्यायाधीश चोलेन्द्रशमशेर राणा, प्रतिनिधिसभाया सभामुख अग्नीप्रसाद सापकोटा व राष्ट्रिय सभाया नायः गणेशप्रसाद तिमिल्सिना जक सहभागी जूगु दु ।

उगु विशेष समारोहपाखें प्रधानमन्त्री ओलीं संविधान दिवसया भिंतुना सन्देशलिसें देसवासीया नामय् सम्बोधन जुइगु प्रधानमन्त्रीया प्रेस सल्लाहकार सूर्य थापां जानकारी ब्यूगु दु ।

कोरोना संक्रमणया जोखिमया हुनिं सीमित सहभागिताय् संविधान दिवस न्यायेकूगु खः । न्हापांगु दँय् मन्त्री, सांसद, कूटनीतिक नियोगया प्रतिनिधि, कर्मचारी, कलाकार लिसेंयापिं सहभागी जूगु खःसां नं थुगु दँ इमित समारोहस सःतूगु मदु ।

सरकारं छेँय् हे च्वनाः राष्ट्रिय ध्वाँय् ब्वयेकूसें संविधान दिवस न्यायेकेत फुक्क नेपाःमिपिन्त आह्वान याःगु दु ।

संविधान दिवसया लसताय् राष्ट्रपति, प्रधानमन्त्री, सभामुख, थीथी राजनीतिक दलया नेतापिन्सं भिंतुना सन्देश जारी याःगु दु ।

Categorized in राष्ट्रिय