nepal investment baink

थौं शुक्रवाःनिसें “राष्ट्रिय बाल नाटक” मेला राष्ट्रिय नाचघरय्

नेवा: अनलाइन न्युज – ललेन्द्र शाक्य | ने.सं. ११४४ सिल्लागा खस्थि (२०८० फागुन १८)

राष्ट्रिय बाल नाटक मेला २०८० थौं शुक्रवाःनिसें न्ह्याइगु जूगु दु ।

नाट्यकर्मी महासंघ नेपालया ग्वसालय् मचापिनिगु अन्तरनिहीत प्रतिभा प्रस्फुटन व विकास याकेगु आज्जुलिसें उगु मेला थौंनिसें फागुन २७ गतेतक न्ह्याइगु जूगु दु ।

देय् न्यंकं खुल्ला आह्वान यानाः विद्यालयस्तरया मचातसें उपलब्ध याकूगु नाटकमध्ये उत्कृष्ट नाटक ल्यज्या यानाः लिपांगु चरणया नाटक मञ्चन याइगु महासंघया केन्द्रीय नायः राजेन्द्र रिमालं जानकारी ब्यूगु खः ।

नायः रिमालं धाःगु दु, ‘जिमिसं देय् न्यंकंया विद्यालयस खुल्ला आह्वान यानाः नाटक माग यानागु खः । उपलब्ध नाटकमध्ये उत्कृष्ट ११ गू नाटक फाइनलया नितिं ल्यज्या यानागु दु । निर्धारित तिथिइ सम्बन्धित विद्यालयपाखें मञ्चन याइगु नाटकया स्क्रिप्ट उपलब्ध याकूगु आधारय् लिपांगु प्रदर्शनया नितिं ल्यज्या यानागुखः ।’

मेलाय् छनोट जूगु च्यागू तगिंनिसें च्वय् थीथी विद्यालयस ब्वनाच्वंपिं विद्यार्थीपिन्सं क्यनीगु नाटकया ई अप्वलय् ३० निसें ३५ मिनेटया जुइगु जूगु दु ।

येँया जमलय् च्वंगु सांस्कृतिक संस्थान (राष्ट्रिय नाचघर)य् जुइगु उगु मेला नीजि व आवासीय विद्यालयया संगठन प्याब्सन नेपाल, सांस्कृतिक संस्थानलिसेया सहकार्यस जुइत्यंगु खः ।

राष्ट्रिय बाल नाटक मेलाय् कासाया विजेता नाटकयात नगद छगू लख, ट्रफी, दसिपौ लःल्हायेगु व अन्तर्राष्ट्रियस्तरया कासाय् सहभागिताया नितिं ह्वःताः बिइगुया लिसें ल्यज्या जूपिं उत्कृष्ट प्रतियोगीपिन्त नगद सिरपाः, दसिपौ व ट्रफी बिइगु ग्वसाः खलकं जानकारी ब्यूगु दु ।

लिसें ज्याझ्वः जुइगु थासय् नेपाल टेलिकमं निःशुल्क सिम वितरण याइगु व नेपाल मेडिकल कलेजं निःशुल्क स्वास्थ्य शिविर संचालन याइगु जूगु दु ।

Categorized in कला