2565 buddha Jayanti ADV

थौं शुक्रवाःनिसें ‘युरोकप २०२०’ सुरु

नेवा: अनलाइन न्युज – ललेन्द्र शाक्य | २०७८ जेठ २८, शुक्रबार १३:१५:१८

कोरोना महामारीया हुनिं दच्छि लिपा लिछ्याःगु युरोपेली च्याम्पियनसिप अर्थात् युरोकप २०२० थौं शुक्रवाःनिसें सुरु जुइगु जूगु दु ।

मिनी विश्वकपया रुपं काइगु युरोकप फुटबल कासा आः जुइगु १६ क्वःगु संस्करण खः । गुकी मुक्कं २४ गू टिमं धेंधेंबल्ला याइगु जूगु दु । उकी ९ गू टिम ला पूर्वविजेता जक हे दु । आःतक १० गू टिमं उपाधि त्याकूबलय् ग्रीस जक थुगुखुसि छनोट जुइमफुत । उकिं नं थुगुखुसि युरोकप प्रतिस्पर्धात्मक जुइफु ।

युरोकपया ६० क्वःगु दँया लसताय् थुगुखुसि कासा ११ गू देसय् जुइत्यंगु दु । उलेज्या कासा इटली व टर्की दथुइ रोमय् जुइसा जुलाई ११ स लण्डनय् च्वंगु वेम्बलीइ फाइनल कासा जुइ ।

उपाधि दाबेदार जुयाः नं आःतक युरोकप त्याकेमफूगु बेल्जियम व इंग्ल्याण्ड नं थुगुखुसि म्हितीगु जूगु दु ।

सहभागी २४ मध्ये थ्यंमथ्यं छगू तिहाइ टिम उपाधिया दाबेदारया रुपं दु । साविक विजेता पोर्चुगल, विश्व विजेता व साविक उपविजेता फ्रान्स, सर्वाधिक स्वक्वःया च्याम्पियन जर्मनी व स्पेन नं विश्व वरियताया शीर्ष थासय् दूगु बेल्जियम मू दाबेदारया रुपं दु । अथेहे, इंग्ल्याण्ड छक्वःया विजेता इटली व नेदरल्याण्डस् नं उपाधि दाबेदारया रुपं दु ।

पूर्व च्याम्पियनमध्ये डेनमार्क, रसिया व चेक रिपब्लिकयात उपाधि दाबेदारया रुपं स्वःगु मदु । डेनमार्क व नेदरल्याण्डस् २०१६ स छनोट जुइमफुसां नं थुगुखुसि पुनरागमन याःगु दु ।

थ्वबाहेक सन् २०१८ स फ्रानसं विश्वकप त्याकूबलय् अप्रत्यासित रुपं लबः काःम्ह क्रोएसियां नं मेगु अप्रत्यासित लिच्वः पिकायेफु ।

पोर्चुगल, फ्रान्स व जर्मनी छगू हे पुचलय् लाःगुलिं छगू पूर्व विजेता देसया यात्रा पुचःपाखें हे समाप्त नं जुइफु । तर खुगू हे टिमया शीर्ष निगू टिमलिसें स्वंगूगु थासय् लाइपिंमध्ये प्यंगू टिम नं प्रिक्वाटर फाइनलय् थ्यनीगुलिं स्वंगुलिं टिम नकआउट नं थ्यनेफु । उकिया नितिं फुक्क खुगू टिमया लिच्वः व मेमेगु पुचःया लिच्वः निर्णायक जुइ ।

कोरोना महामारीं यानाः वंगु दँ हे जुइमाःगु युरोकप दच्छि लिपा लिछ्याःगु खः ।

Categorized in कासा