nepal life 2076 3 18

थौं शुक्रवाःनिसें टोकियो ओलम्पिक

नेवा: अनलाइन न्युज – ललेन्द्र शाक्य | २०७८ श्रावण ८, शुक्रबार १४:१९:२४

विश्व खेलकुदया कुम्भ मेला कथं कयातःगु ३२ क्वःगु ग्रीष्मकालीन ओलम्पिकया औपचारिक रुपं उलेज्या थौं शुक्रवाः जुइगु जूगु दु । जापानया राजधानी टोकियोय् जुइगु छगू विशेष ज्याझ्वःया दथुइ ओलम्पिकया उलेज्या थौं शुक्रवाः न्हिनय् ४ः४५ ता इलय् जुइगु जूगु दु ।

उलेज्या थौं शुक्रवाः जुइगु जूसां नं छुं छुं कासाया धेंधेंबल्ला धाःसा बुधवाःनिसें हे सुरु जुइधुंकूगु दु । ओलम्पिकय् सहभागिता क्यनेगु नितिं हलिं न्यंकंया कासामि, प्रशिक्षक व कासा पदाधिकारी टोकियो थ्यनेधुंकूगु दु । नेपालं न्याम्ह कासामि व प्यम्ह प्रशिक्षकलिसें २३ म्ह दुजःया टोली टोकियो थ्यंकेधुंकूगु दु ।

उलेज्या समारोहया मार्चपासय् नेपाःया ध्वाँय् पौडीया कीर्तिमानी कासामि गौरिका सिंह व एलेक्जेन्डर (एलेक्सं शाह नं ज्वनीगु जूगु दु । 

सन् २०२० स ग्वसाः ग्वयेगु तिथि तय जूगु ओलम्पिक कोरोना भाइरसया महामारीया हुनिं दच्छि लिपालाःवंगु खः । दर्शकया उपस्थिति विना कासा संचालन जुइगु जानकारी ब्यूगु दु ।

सुटिङया कल्पनां शनिवाः सुथय् धेंधेंबल्ला याइगु

नेपाःपाखें टोकिया ओलम्पिकय् सहभागी न्याम्ह कासामिमध्ये सुटिङया कल्पना परियारं शनिवाः सुथय् धेंधेंबल्ला याइगु जूगु दु । परियारं मिसा १० मिटर एयर राइफलय् धेंधेंबल्ला याइगु जूगु दु । वं छवाः न्ह्यः हे जापान थ्यंकाः अभ्यास यानाच्वंगु दु । परियारया कासा शनिवाः सुथय् ५ः१५ ता इलय् सुरु जुइ ।

टोकियो ओलम्पिकय् पौडीपाखें गौरिका, एलेक्स शाह, एथलेटिक्सया सरस्वती चौधरी, सुटिङया कल्पना परियार व जुडोया सोनिया भट्टं धेंधेंबल्ला याइगु जूगु दु । 

गौरिका सिंहं निक्वःगुखुसि ओलम्पिक कासा म्हितेत्यंगु खःसा मेपिं प्यम्ह कासामिपिन्सं न्हापांगुखुसि ओलम्पिक कासाय् म्हितेत्यंगु खः ।

पौडीया गौरिकां न्हापांगुखुसि सन् २०१६ य् रियो ओलम्पिकय् सहभागिता प्वंकूगु खः । नेपालय् ग्वसाः ग्वःगु १३ क्वःगु दक्षिण एसियाली खेलकुद (साग) य् सिंहं पौडीइ प्यंगू स्वर्ण, निगू रजत व स्वंगू कास्य पदक त्याकूगु खः । सिंहं मिसा १०० मिटर फ्रि स्टाइल व एलेक्स शाह नं मिजं १०० मिटर फ्रि स्टाइलय् धेंधेंबल्ला याइगु जूगु दु ।

अथेहे, भट्टं मिसा ४८ किलो तौल समूह व चौधरीं मिसा १०० मिटर दौडय् सहभागिता प्वंकीगु जूगु दु । 

टोकियो ओलम्पिक थ्वहे साउन २४ गते क्वचाइगु जूगु दु ।

Categorized in कासा