1142 nhoo dan adv

थौं ल्हुति पुन्हि , बालाजु हितिइ मेला

थौं चौलाथ्व पुन्हि, सकस्यां ल्हुति ।

थौंया दिनय् येँया ल्हुति अर्थात बालाजुइ दुगु नीनिधाः हितिइ मेला जुइ । ल्हुतिइ मेला जुइगु दिं जुयाः थौंया दिंयात ल्हुति पुन्हि धायेगु याःगु खः ।
थौंया दिनय् मनूत ल्हुतिइ नीनिधाः हितिइ म्वःल्हुयाः अथवा ख्वाः सिलाः जामाच्व गःवनेगु याइ ।
थौंया हे दिंकुन्हु ’मन्नादी’ देवीया जन्म जूगु बिश्वास कथं मिसातय्सं नीनिधाः हितिइ म्वःल्हुयाः अन हे दुम्ह मन्नादी देवीयात पुज्याःसा पुण्य लाइगु जनबिश्वास दया वयाच्वंगु दु । अथे हे अनया नीनिधाः हितिइ म्वःल्हुइबलय् ल्वय् आदि नाश जुइगु जनविश्वास दया वयाच्वंगु दु ।

येँया पश्चिम कुनय् लाःगु धार्मिक लागा ल्हुतिया नीनिधाः हितिइ म्वःल्हुइत वा ख्वाः सिलेत थौं नं म्वःम्वः हे मनूत मुनाच्वंगु दु । व जामाच्व गःवंपिं नं उतिकं हे खनेदु ।  थ्व हे झ्वलय् नेवाः न्ह्यलुवा डा। महेशमान श्रेष्ठया नेतृत्वय् ग्वाहालि पुचःपाखें ५०म्हेसिया पुचः नं जामाच्व गःवंगु दु ।
ल्हुतिइ नेपाल संवत् ८७५य् येँया जुजु जयप्रकाश मल्लं २१धाः ल्वँहहिति स्थापना याःगुलिइ लिपा वि सं। १८५५य् जुजु रणबहादुर शाहं छधाः हिति थप याःगु खँ इतिहासय् न्ह्यथनातःगु दु । ल्हुतिइ बालकण्ठ नारायण दुगुलिं व हे द्यःया नामं थुगु थाय्यात बालाजु नं धायेगु याः ।
सक्वय् धाःसा थौंया दिंयात सक्व पुन्हिकथं हनेगु याइ ।

थौं सक्वय् च्वंम्ह म्हासुख्वाः माजुयात विहारं क्वत हयाः जात्रा न्ह्याकी । सक्वय् जात्रा जुइगु पुन्हि जुयाः थुकियात अन ‘सक्व पुन्हि’ नं धायेगु याः ।
हाकनं थौंया दिं हनुमानभक्ततय्गु नितिं हनुमान जयन्तीया दिं खः । अष्ट चिरंजिविमध्येम्ह छम्ह नालातःम्ह हनुमान बूगु न्हि कथं थौंया दिंयात ’हनुमान जयन्ती’ कथं नं माने यायेगु याः।

(नेवाः अनलाइनया फाइल पाखें )