nepal investment baink

थौं भारतया ७५ क्वःगु गणतन्त्र दिवस, फ्रान्सेली राष्ट्रपति मूपाहाँ

नेवा: अनलाइन न्युज – ललेन्द्र शाक्य | २०८० माघ १२, शुक्रबार १२:५०:२३

गणतन्त्र भारतं थौं शुक्रवाः ७५ क्वःगु गणतन्त्र पलिस्था दिवस न्यायेकूगु दु ।

“विकसित भारत” व “भारत–लोकतन्त्रया मातृका” धैगु नारालिसें भारतं तःजिक गणतन्त्र दिवस न्यायेकूगु दु ।

गणतन्त्र दिवसय् भारतं मूपाहाँया रुपं फ्रान्सया राष्ट्रपति इम्यानुएल मैक्रोयात सःतूगु दु । भारत व फ्रान्स रणनीतिक साझेदारीया २५ क्वःगु दँया वर्षगाँठया लसताय् फ्रान्सया राष्ट्रपति भारतया दकले तःधंगु सरकारी महोत्सवय् ब्वति काःगु दु । राष्ट्रपति मैक्रोया आतिथ्ययात ध्यानय् तयाः सरकारं दिल्लीया सुरक्षा व्यवस्थायात कडा याःगु दु । गुकिया नितिं १४ हजार सुरक्षाकःमि परिचालित जूगु दु ।

सन् १९५० स थौंया दिं भारत गणतन्त्र घोषित जूगु खः । भारत ब्रिटिश उपनिवेशपाखें १९४७ या अगष्ट १५ स स्वतन्त्र जूगु खः । तर सन् १९५० या जनवरी २६ तारिखय् संविधान जारी जुइधुंकाः भारत सार्वभौम, लोकतान्त्रिक व गणतन्त्रात्मक राष्ट्र घोषित जूगु खः ।

भारतया संविधानसभां १९४९ या नोभेम्बर २६ स छ्यःगु संविधानं ‘भारत सरकार ऐन, १९३५’यात विस्थापन यायेधुंकाः भारत गणतन्त्रया युगय् दुहाँ वंगु खः ।

वधुंकाः थुखे भारतं दँय् दसं जनवरी २६ यात गणतन्त्र दिवसया लसताय् न्यायेकाः वयाच्वंगु दु ।

लैनचौरय् च्वंगु भारतीय दूतावासं तकं थीथी ज्याझ्वः यानाः भारतया ७५ क्वःगु गणतन्त्र पलिस्था दिवस तःजिक न्यायेकूगु दु ।

Categorized in अन्तर्राष्ट्रिय