prabhu baink new

थौं बिहिवाःनिसें खाली सिलिण्डरया मू लागू

नेवा: अनलाइन न्युज – ललेन्द्र शाक्य | २०७७ आश्विन २९, बिहिबार ११:१३:०८

नेपाल एलपी ग्यास उद्योग संघं भुतू ज्याय् छ्यलीगु एलपी ग्यासया नँया खाली सिलिण्डरया मू क्वःछ्यूगु दु । दुर्गमया क्षेत्र बाहेकया जिल्लाय् ग्यास सिलिण्डरया मूल्यस एकरुपता हयेत क्वःछ्यूगु न्हू मू कथं २,१०० तका थौं बिहिवाःनिसें लागू याःगु दु ।

थ्वसिबें न्ह्यः संघं ग्यास विक्रेतापिन्सं फरक फरक मू तयाः खाली सिलिण्डर मियाच्वंगु धासें न्हापांगु चरय् ३ नम्बर प्रदेश दुने संचालनय् दूगु २९ गू उद्योगया सिलिण्डरया मू क्वःछ्यूगु खः । तर, थौं निसें लागू जुइगु कथं दुर्गमया क्षेत्र बाहेकया जिल्लाया नितिं खाली सिलिण्डरया मू लागू याःगु संघया नायः गोकुल भण्डारीं जानकारी ब्यूगु दु ।

भण्डारीया कथं उद्योगं खरिद याःगु मूसिबें म्हो मूल्यस बिक्री याःसां नं ग्यासया डिलर कथं मू फरक फरक जुइधुंकाः मू क्वःछ्यूगु खः । न्हूगु सिलिण्डरया उपभोक्ता धरौटी रसिद मदूगु सिलिण्डरया दायित्व ग्यास उद्योगं मकाइगु संघं जानकारी ब्यूगु दु ।

संघं सिलिण्डर खरिद यायेबलय् अनिवार्य रुपं सम्बन्धित उद्योगया धरौटी रसिद विक्रेता डिलरपाखें कायेत तकं इनाप याःगु दु । रसिद मकाःगु सिलिण्डरया जवाफदेही व दायित्व उद्योगं मकायेगु तकं जानकारी ब्यूगु दु ।

संघं क्वःछ्यूगु न्हूगु मूल्य कथं सच्छि तका दां विक्रेताया नितिं छुटेयाःगु जानकारी ब्यूगु दु । संघं थःगु कम्पनी बाहेक मेगु कम्पनीया खाली सिलिण्डर हिलाबुला यायेगु गैरकानूनी जूगु धासें हिलाबुला याःगु लुल धाःसा कारवाही यायेगु जानकारी ब्यूगु दु ।

उद्योग व विक्रेता कथं खाली सिलिण्डरया मू ३५०० तक काइगु यानाच्वंगुलिं थौंनिसें फुक्क उद्योगया सिलिण्डरया मू २१०० तका लागू जूगु दु ।

Categorized in बजाः