nepal investment baink

थौं बाल दिवस : बालअधिकारया संरक्षण व प्रवर्द्धनय् नुगः क्वसायेकेमाःगु उपराष्ट्रपतिया बः

नेवा: अनलाइन न्युज | २०८० भाद्र २९, शुक्रबार ११:३५:३५

उपराष्ट्रपति रामसहायप्रसाद यादवं संविधानय् दूगु व्यवस्था कथं मचातय्गु शिक्षा, स्वास्थ्य, खेलकुद, मनोरञ्जन व व्यक्तित्व विकासया योजना अनिवार्य रुपं तर्जुमा यानाः लागू यायेमाःगुलि बः ब्यूगु दु ।

राष्ट्रिय बाल दिवस २०८० या लसताय् थौं शुक्रवाः भिंतुना देछासें उपराष्ट्रपति यादवं स्थानीय तहलय् बाल क्लब व मचा ल्यायम्ह पुचःया सिर्जनात्मक लिसें व्यक्तित्व विकासया ज्यायात प्राथमिकताय् तयेमाःगु धाःगु दु ।

मचातय्गु नितिं प्राविधिक शिक्षा व सीपमूलक प्रशिक्षणया आयोजना यायेमाःगुलि बः बिसें उपराष्ट्रपति यादवं बालश्रम, बालगृहय् अनधिकृत सिफारिस, बाल हिंसा व दुर्व्यवहार यायेगु व बालविवाहयात संरक्षण व समर्थन यायेगुथें जाःगु गलत ज्यात समाजपाखें निषेध यायेमाःगु धाःगु दु ।

फुक्क स्थानीय तहलय् बालकोषया पलिस्था यानाः सरकारं तय याःगु ज्यात सामाजिकीकरण सेवा, जोखिमय् लाःपिं मचातय्त आपतकालीन राहत सेवा, स्वास्थ्योपचार सहायता आदिइ बः बिसें यादवं बालअधिकारया संरक्षण व प्रवर्द्धनय् फुक्कसिनं नुगः क्वसायेकाः पलाः न्ह्याकेमाःगु धाःगु दु ।

उपराष्ट्रपति यादवं सन्देशय् धाःगु दु, ‘बालअधिकारया संरक्षण व प्रवद्र्धनय् जनप्रतिनिधिया महत्वंजाःगु भूमिका दइगुलिं इमिसं थुकिया नितिं बालमैत्री ज्याझ्वःया संचारन यायेत आवश्यक जू । बाल संरक्षण घटना व्यवस्थापन ज्याय् स्वास्थ्यकःमिया भूमिका नं उतिकं हे महत्वं जाः ।’

मचातय्गु वासः यायेगु नितिं वःपिं अभिभावक व मचातय्त स्वास्थ्यसम्बनधी परामर्श सेवा उपलब्ध याकेगु, मचातय्त बालमैत्री रुपं वासः व स्वास्थ्य परीक्षण आदिया नितिं सहजीकरण यायेत स्वास्थ्यकःमि सदां अग्रसर जुइमाःगु यादवया धापू दु ।

बालअधिकारया संरक्षणय् शिक्षकया दायित्व, कर्तव्य व जिम्मेवारी नं महत्वं जाःगु न्ह्यथंसें उपराष्ट्रपति यादवं शिक्षकं विद्यालय पिने दुपिं मचातय्त विद्यालयस हयेत आवश्यक पहल यायेगु, विद्यालयस भय व हिंसारहित सिकाइया उपायत अवलम्बन यानाः शिक्षण सिकाइ यायेगु, विद्यालयस बाल सहभागिता प्रवद्र्धन, बाल क्लब गठनलिसेंया थीथी सिर्जनात्मक क्रियाकलापय् मचातय्गु सहभागिताया नितिं सहजीकरण यायेमाःगुलि बः ब्यूगु दु ।

थौंया मचात हे कन्हय्या कर्णधार जूगु धासें यादवं मचातय्त संविधानं व्यवस्था याःगु हक, अधिकार प्रत्याभूत जुइगु कथं ज्या यायेत अझ अप्वः सचेत जुइमाःगुजरुरी जूगु धाःगु दु ।

नेपालं संयुक्त राष्ट्र संघीय बालअधिकार सम्बन्धी महासन्धियात अनुमोदन याःगु दिंयात लुमंकूसें राष्ट्रिय बालदिवस न्यायेकाः वयाच्वंगु दु  धकाः धाःगु दु ।

सन् १९९० सेप्टेम्बर १४ य् नेपालं बालअधिकार सम्बन्धी महासन्धीयात अनुमोदन याःगु खः । थुगु दँ बालदिवसया मू नारा ‘बालबालिकाय् लगानी : सुनिश्चित भविष्यया थालनी’ तःगु दु ।

Categorized in राष्ट्रिय