kmc bidya

थौं बछलागा नवमि : शताब्दी पुरुष सत्यमोहन जोशीया १०१ दँ बुदिं

नेवा: अनलाइन न्युज – ललेन्द्र शाक्य | २०७७ जेठ ३, शनिबार ०९:२३:२४

‘नेपाःया गौरव, नेवाः म्हसीका’ संस्कृतिविद्, भाषारत्न, शताब्दी पुरुष डा. सत्यमोहन जोशी थौं ने.सं. ११४० बछलागा नवमि (२०७७ जेष्ठ ३ गते) शनिवाः १०१ दँय् च्वनादीगु दु ।

खय्तला भाजु जोशीं थःगु बुदिं बि.सं. कथं बैशाख ३० गते थःगु बुदिं हनादी धुंकूगु दुसा वय्कलं नेपाल संवतया तिथि कथं दँय् दसं थौंया दिं अर्थात् बछलागा नवमिया दिं बुदिं हनाः वयाच्वनादीगु दु ।

यलया बखुँबहालय् च्वनादीम्ह भाजु सत्यमोहन जोशीया थौं सच्छि व छदँ (१०१ दँ) भिं–बुदिंया लसताय् नेवाः परम्परा कथं पूजाविधि यानाः बुदिं हनेगु ज्या जूगु दु । थौंकन्हय् जुयाच्वंगु लकडाउनया हुनिं थःगु हे छेँ दुने तःजिक बुदिं मन्यायेकूसे सामान्य कथं हनेगु ज्या जूगु दु । 

खय्तला भाजु जोशी सच्छि दँ क्यंगु लसताय् सत्यमोहन शताब्दी दँ कथं यल महानगरपालिकां दच्छि यंकंया थीथी ज्याझ्वःया ग्वसाः ग्वयातःगु खः । तर हलिंन्यंकं कोरोना भाइरस कोभिड १९ या संक्रमणया महामारीया हुनिं व संक्रमण रोकथाम यायेगु नितिं जुयाच्वंगु लकडाउनयात ध्यानय् तयाः शताब्दी दँया थीथी ज्याझ्वः आःया नितिं लिछ्यानातःगु दु ।

थ्वहे झ्वलय् शताब्दी पुरुष सत्यमोहन जोशीया थौंया १०१ दँया  भिं–बुदिं नं सीमित रुपं मज्जिमगाःपिं मनूत जक च्वनाः व याये हे माःगु परम्परागत विधि पूजा कथं जक हनेगु ज्या जूगु दु । 

नेवाः अनलाईनन्यूजलिसें सकल नेवाः ख्यलं शताब्दी पुरुष सत्यमोहन जोशीया १०१ दँ भिं–बुदिंया लसताय् दुनुगलंनिसें भिंतुना देछाःसें ताः आयु व भिं उसाँय् सदां जुइमाः धकाः कामना यानाच्वना ।

Categorized in नेवाः