ब्रेकिंग

  • निषेधाज्ञा ::: स्वनिगलय् श्रावण २७ गतेतक निषेधाज्ञा थप ।
zero media family planning adv

थौं नेकपा संस्थापक पुष्पलाल श्रेष्ठया स्मृति दिवस

नेवा: अनलाइन न्युज – ललेन्द्र शाक्य | २०७८ श्रावण ७, बिहिबार १०:४४:५७

नेपाल कम्युनिष्ट पार्टीया संस्थापक महासचिव पुष्पलाल श्रेष्ठया ४३ क्वःगु स्मृति दिवस थीथी ज्याझ्वः यासें न्यायेकूगु दु ।

स्मृति दिवसया लसताय् नेकपा एमालें तुलसीलाल स्मृति प्रतिष्ठानय् थौं बिहिवाः छगू ज्याझ्वः ग्वसाः ग्वःगु दु । थौं बिहिवाः न्हिनय् १ ता इलय् जुइगु उगु ज्याझ्वलय् नेकपा एमाले नायः केपी शर्मा आली तकं सहभागी जुइगु एमाले केन्द्रीय ज्याकुथिया छ्याञ्जे शेरबहादुर तामाङं जानकारी ब्यूगु दु ।

अथेहे, थौं बिहिवाः पुष्पलाल श्रेष्ठया ४३ क्वःगु स्मृति दिवसया लसताय् किपूया पुष्पलाल पार्कय् नं छगू तःजिगु ज्याझ्वः दूगु दु । नेकपा एमालेया बरिष्ठ नेता माधवकुमार नेपाल लिसें थीथी नेता कार्यकर्तापिनिगु सहभागिता दूगु उगु ज्याझ्वलय् पुष्पलालया झ्वाता (सालिक)य् स्वां देछानाः पुष्पलालयात लुमंकूगु खः ।

पुष्पलाल पार्कय् जूगु उगु ज्याझ्वलय् किपू नगरपालिकाया मेयर उपमेयरलिसें थीथी वडाया वडाध्यक्ष, वडा दुजःलिसें कार्यकर्तापिनिगु उपस्थिति दूगु खः ।

रामेछापया भँगेरीइ वि.सं. १९८१ असार १५ गते जन्म जूम्ह पुष्पलाल श्रेष्ठं २००६ साल बैशाख १० गते नेपाल कम्युनिष्ट पार्टी पलिस्था याःगु खः । नेपालय् वाम प्रजातान्त्रिक आन्दोनलय् महत्वं जाःगु भूमिका म्हितूम्ह पुष्पलाल श्रेष्ठया २०३५ साल साउन ७ गते भारत प्रवासय् च्वनाच्वंगु इलय् मदुगु खः ।

२००५ सालय् पुष्पलालं माक्र्स व एंगेल्सपाखें च्वयातःगु विश्व कम्युनिष्ट पार्टीया घोषणापत्रयात नेपालय् अनुवाद याःगु खः । उकिया दच्छि लिपा २००६ सालय् पुष्पलालं नेपाल कम्युनिष्ट पार्टी (नेकपा) नीस्वंगु खः । पुष्पलाल श्रेष्ठ नेकपाया संस्थापक महासचिव खः ।

Categorized in राजनीति