zero media family planning adv

थौं नं पसः चायेके मबिल प्रहरीं, सरकारयात ताःचा लःल्हायेगु जुइ ः ब्यापारी

नेवा: अनलाइन न्युज – ललेन्द्र शाक्य | २०७७ जेठ २८, बुधबार ०९:३५:२३

येँया न्हूसतक लागाया व्यापारीपिन्त पसः चायेकेगुलि थौं बुधवाः नं प्रहरीं रोक तःगु दु । स्वन्हु न्ह्यःनिसें खुल्ला जूगु न्हूसतक क्षेत्रया पसःत म्हिगः मंगलवाः प्रहरीं आकाझाकां बन्द याकूगु खः ।

तर व्यापारीपिन्सं बुधवाः नं पसः चायेकेगु घोषणा याःगु खः । उगु घोषणा कथं थौं बुधवाः सुथय् हे पसः चायेकेत वःपि. ब्यापारीपिन्त प्रहरीं अवरोध थंगु खः । थौं सुथय् न्हापाया दिंथें प्रहरी व व्यापारीदथुइ घ्वात्तुघ्वायेगु ज्या धाःसा मजुल ।

नेपाल राष्टिय व्यवसायी महासंया नायः नरेश कतुवालं लकडाउन छ्वासुकेगु बारे थौं बुधवाः सरकारं छुं नं निर्णय मयाःसा आन्दोलनयात तच्वः यायेगु ख्याच्वः तकं ब्यूगु दु । कुटवालं थौं थःपिन्सं थःगु हे लँपु ल्ययेगु व व थौं छुं नं निर्णय मजुल धाःसा कन्हय् बिहिवाः सलंसः ब्यापारीपिं सतकय् कुहाँ वयाः प्रदर्शन यायेगु जानकारी नं ब्यूगु दु ।

कटुवालं व्यवसाय संचालन यायेमफूगु अवस्थाय् थ्यंगु धासें आः सरकारयात ताःचा लःल्हायेगु खँया जानकारी नं ब्यूगु दु । नायः कटुवालं लकडाउनया छुं मोडालिटी नं महिलीगु व व्यवसायीपिन्त राहत प्याकेज नं घोषणा मयाइम्ह सरकारं थःपिनिगु सकतां जिम्मा कायेमाःगु खँ धाःगु दु ।

थ्वसिबें न्ह्यः लकडाउनया तिथि थप यानाः सरकारं छुं विकल्प मब्यूगु धासें व्यापारीपिन्सं जेठ २२ गते सुथय् निसें पसः चायेकेगु पलाः न्ह्याकूगु खः । उगु दिं लिपा फुक्क पसःत सुथय् ११ ता ईतक खुल्ला जूगु खः ।

तर मंगलवाः आकाझाकां प्रहरी वयाः पसःत बन्द याकाः वःबलय् ब्यापारीपिन्सं तं प्वंकूगु खः ।

प्रहरी अधिकृतपिन्सं धाःसा सरकारं छुं न्हूगु निर्देशन मब्यूगुलिं लकडाउनय् कडाइ यानागु धाःगु दु । स्वनिगःया प्रहरी प्रमुख डिआईजी विश्वराज पोखरेलं थःपिनसं सरकारया आदेश कार्यान्वयन यायेगु खः, पसः संचालन याकेबिइगु धैगु मोडालिटी मदु धकाः धाःगु दु ।

थ्वहे दथुइ थौं बुधवाः लकडाउनया मोडालिटी लिसेंया विषयस सहलह यायेत मन्त्रिपरिषद बैठक सःतूगु दु ।

Categorized in राजनीति