swastha 3

थौं चथाः

नेवा: अनलाइन न्युज – ललेन्द्र शाक्य | २०७८ भाद्र २५, शुक्रबार ०९:०८:५४

चतुर्दसि थौंया दिं नेवाःतसें चथाः नखः न्यायेकेगु याइ । बहनी थःगु छेँय् छेँय् दूगु तिमिला द्यःयात हलिमलि  छानाः द्यः पुज्यायेगु याइ ।

अथेहे, थौं गणेद्यःयात नं पूजा यायेगु परम्परा दु ।

प्रकृतियात पूजा यायेगु परम्परा दुपिं नेवाःतसें तिमिला बांलाःम्ह सिचुकाः बिइम्ह व ख्युँथाय् जः बिइम्ह जूगुलिं तिमिलायात द्यः कथं नालाः पुज्यानाः वयाच्वंगु खः ।

थौं गणेश चतुर्दसि ‘चथाः’ जूगुलिं येँया थीथी थासय् च्वंगु गणेद्यःया देगलय् सुथनिसें हे भक्तजनपिनिगु भीड जूगु खः ।

येँया कमलादीइ च्वंम्ह गणेद्यःयात दँय् दसं थौंया हे दि गणेश चौथि लाकाः महापूजा याइगु यानाः वयाच्वंगु दु ।

न्ह्याग्गु नं भिं ज्या यायेबलय् न्ह्यःने तयाः पूजा याइम्ह गणेद्यः थौंया हे दिं जन्म जूगु जनविश्वास दु । उकिं पूजा यायेगु नितिं श्री कमलादी गणेश जमःमि गुथि त्यर कमलादीं व्यवस्थापन यानाः वयाच्वंगु दु ।

‘तिमिला स्वयेमज्यू धाइ’

भाद्र महिनाया शुक्ल चौथी (चतुर्दसी)या थौंया दिं हनीगु नखः चथाःया दिं छेँ–छेँय् छ्व, कय्गु, चना, बसपति (बनस्पति), बकुला, मुस्या, कःनि व मेमेगु गेडागुडी सियाः तुसि व मेमेगु सिसाबुसा तया चथाःद्यःयात न्हापां भाग तया सकल छेँजः छथासं मुनाः नयेगु चलन दु । थथे सिया नयेगुयात हलमलः धायेगु चलन दु ।

थुज्वःगु सियातःगु हलमलः नल धाःसा थीथी ल्वय्पाखें मुक्ति जुइगु नापं प्वाः स्वाइगु व प्वाःया थीथी ल्वय्त नं लाइ धैगु जनविश्वास दयावयाच्वंगु खः ।

थुगु दिं बहनी पिने त्वालय् खिचातसें मंकाःकथं स्वकः उया हलकि हलमलः नइगु चलन समाज दुने परम्परांनिसें न्ह्याना वयाच्वंगु दु । थुगु दिं मनूतसें सनिलया इलय् थःथःगु म्हगलय् मल्ता घायेगु याइसा थः मचाखाचापिन्त क्वथा दुने तया पितमछ्वइगु चलन नं दु । सकल मनूत छेँसं पिहाँ मवःसे छेँ दुने च्वना सुलाच्वनीगु खः ।

थथे छाय् सुलाच्वनीगु धाःसा बहनी चथाः द्यः पिहाँ वइगु पाः लाइ धकाः सुलाः च्वनेमाःगु खः धकाः परम्परां निसेंया चलन खः ।

समाजय् चथाः द्यःयात ‘खुँ द्यः’ धायेगु नं चलन दु । थुगु चथाःया दिं बहनी सर्गतय् च्वंगु तिमिला स्वयेमज्यू धैगु नं धापू दु ।

थुगु चथाः नखः गणेश व तिमिलानाप स्वापू दुगु नखः खः । अथेहे, चथाः नखःयात नेवाः समुदायं चीधंगु मोहनी नखःया रुपं नं कयाः हनाः वयाच्वंगु दु ।

Categorized in नेवाः