2565 buddha Jayanti ADV

थौं खण्डग्रास सूर्यग्रहण, गनं गनं खिउँसे च्वनी

नेवा: अनलाइन न्युज – ललेन्द्र शाक्य | २०७८ जेठ २७, बिहिबार १०:००:५१

थौं बिहिवाः खण्डग्रास सूर्यग्रहण जुइगु जूगु दु । सुदूरपूर्वी व उत्तर अमेरिका, मंगोलिया, चीन, नर्वे, ग्रीनल्याण्ड, युके, युरोप व  प्यासिफिक क्षेत्रपाखें खनेदइगु सूर्यग्रहणया नेपालय् धाःसा छुं नं लिच्वः मलाइगु पञ्चाङ निर्णायक समितिं जानकारी ब्यूगु दु ।

समितिया सचिव सूर्यप्रसाद ढुंगेलया कथं नेपालय् सूर्यग्रहण खनेमदइगु जूगुलिं थुकियात बारेयायेमाःगु आवश्यकता मदु ।

जेठ महिनाया अमावश्यय् जुइत्यंगु सूर्यग्रहण थुगु दँया न्हापांगु सूर्यग्रहण खः । नेपाली ई कथं थौं बिहिवाः न्हिनय् १ः५७ ता ईनिसें सनिलया ६ः५६ तक जुइगु थुगु सूर्यग्रहण नेपाःया छुं नं हिस्सापाखें खनेमदइगु ढुंगेलं जानकारी ब्यूगु दु ।

ग्रहणया इलय् सुद्र्यो कुण्डलाकार आकृति कथं खनेदइ । गुकियात पश्चिमापिन्सं रिङ अफ फायर धायेगु याइ । सूद्र्यो, तिमिला व पृथ्वी तप्यंगु ध्वलय् वइबलय् कुण्डलाकार सौर्यग्रहण जुइ । सामान्यतया, थ्व खगोलीय घटना सुद्र्यो व पृथ्वीया दथुइ तिमिला वइगु हुनिं जुइ व छुं ईया नितिं छुं खास क्षेत्रय् खिउँसे च्वनी ।

Categorized in अन्तर्राष्ट्रिय