nepal investment baink

थौं किपू संगीत प्रतिष्ठानया न्हापांगु सांगितिक ज्याझ्वः “बसन्त उत्सव” कीर्तिपुर सिनेप्लेक्सय्

नेवा: अनलाइन न्युज – ललेन्द्र शाक्य | ने.सं. ११४४ बछलाथ्व खस्थि (२०८१ बैशाख ३१ गते) सोमवाः

थौं सोमवाः किपू संगीत प्रतिष्ठानया न्हापांगु सांगितिक ज्याझ्वः कथं “बसन्त उत्सव” ज्याझ्वः किपूया पांगाय् च्वंगु कीर्तिपुर सिनेप्लेक्स हलय् जुइत्यंगु दु ।

थौं सोमवाः न्हिनय् ३ः३० इलय् न्ह्याइगु उगु बसन्त उत्सव ज्याझ्वलय् मूपाहाँ कथं “मह”या “म” ख्यालिजुजु मदनकृष्ण श्रेष्ठ व “मह”या “ह” हरिवंश आचार्यउपस्थित जुइगु जूगु दु ।

उगु बसन्त उत्सव सांगितिक ज्याझ्वलय् किपूया नांजाःपिं कलाकारपिं वीरप्रसाद भन्सारी, गुज्ये मालाकार, ज्ञानेश्वर निभाः, सतीश महर्जन, मथुरा महर्जन, रीता महर्जनलिसें थीथी न्हूपिं व पुलांपिं कलाकारपिन्सं थीथी सांगितिक ज्याझ्वः न्ह्यब्वइगु जूगु दु ।

ज्याझ्वलय् नांजाःम्ह कलाकार यमन श्रेष्ठलिसें डान्सिङ क्वीन आराध्यालक्ष्मी खड्गीया नं विशेष प्रस्तुति जुइगु जूगु दु ।

किपूया बरिष्ठ कलाकःमि हरिशरण सायमिया संयोजकत्वय् जुइगु उगु बसन्त उत्सव सांगितिक ज्याझ्वलय् किपू व किपू लागा पिनेच्वंपिं नांजाःपिं कलाकारपिनिगु सांगितिक ब्वज्या लिसें कीर्तिपुर सिंगिङ आइडलया उत्कृष्ट कलाकारपिं जोन महर्जन, एकता महर्जनलिसें थीथी प्रतिभापिनिगु सांगितिक ब्वज्या जुइगु जानकारी ग्वसाः खलः किपू संगीत प्रतिष्ठानं जानकारी ब्यूगु दु ।

ग्वसाः खलः किपू संगीत प्रतिष्ठानं “बसन्त उत्सव” ज्याझ्वः निःशुल्क कथं टिकट म्वाःगु जानकारी बिसें सकलसित कीर्तिपुर सिनेप्लेक्स हलय् उपस्थितिया नितिं इनाप याःगु दु ।

Categorized in कला