नेवा: अनलाइन न्युज – ललेन्द्र शाक्य | २०७९ चैत्र ३, शुक्रबार १०:०९:०३

उपराष्ट्रपति पदया निर्वाचन थौं शुक्रवाः जुइत्यंगु दु । न्हूबानेश्वरय् च्वंगु संघीय संसद् भवनया ल्होत्से हलय् उपराष्ट्रपति ल्ययेगु नितिं मतदान जुइत्यंगु खः ।

सुथय् १० ता ईनिसें न्हिनय् ३ ता ईतक मतदानया व्यवस्था यानातःगु निर्वाचन अधिकृतया ज्याकुथिं जानकारी ब्यूगु दु । निर्वाचनया सकतां तयारी पूवंगु सहायक निर्वाचन अधिकृत अमृताकुमारी शर्मां जानकारी ब्यूगु दु । मतदान क्वचायेखतं मतगणना न्ह्याइगु व सनिलया ६ ता ईदुने निर्वाचन लिच्वः सार्वजनिक यायेगु तयारी याःगु शर्मां धाःगु दु ।

उपराष्ट्रपति पदया निर्वाचनया नितिं नेकपा एमालेया अष्टलक्ष्मी शाक्य बोहरा, सत्ता गठबन्धनपाखें जसपाया रामसहाय प्रसाद यादव, जसपाया हे प्रमिला कुमारी यादव व जनमत पार्टीया ममता झा यानाः प्यम्ह उम्मेदवार दु । जसपाया प्रमिला कुमारीं थःगु उम्मेदवारी निष्कृय जूगु घोषणा याःगु दु । तर उम्मेदवारी लितकायेगु ईसिबें लिपा जक उम्मेदवारी निष्कृय जूगु धाःगुलिं मतपत्रय् वया तकं नां व किपाः दुथ्याःगु दु ।

उपराष्ट्रपतिया निर्वाचनय् संघीय संसद् व प्रदेशसभा दुजः मतदाता जुइ । इमिगु नितिं ब्यागलं ब्यागलं मतदान केन्द्रया व्यवस्था याःगु दु । संघीय संसदया दुजःपिन्सं संसद् भवनया मू ध्वाखां दुहाँ वनाः मतदान याइसा प्रदेशसभाया दुजःपिन्सं बगैंचापाखेया वाउँगु ध्वाखां दुहाँ वनाः मतदान यायेगु व्यवस्था यानातःगु दु ।

निर्वाचन आयोगं उपराष्ट्रपति निर्वाचन, २०७९ या नितिं निगू कथंया मतपत्रया व्यवस्था याःगु दु । संघीय संसद्या दुजःपिन्सं मतदान यायेगु प्रयोजनया नितिं ह्याउँगु मसी व प्रदेशसभा दुजःपिन्सं मतदान यायेगु प्रयोजनया नितिं वाउँगु मसीं मतपत्र छपाई यानातःगु दु । मतपत्रय् उम्मेदवारया किपाः व नां दुथ्याकातःगु दु । मतपत्रय् दुपिं सुं छम्ह उम्मेदवारया किपाः व नां अंकित जूगु कोथाय् स्वस्तिक छाप तयाः मत बिइमाः ।

उपराष्ट्रपतिया निवार्चनय् संघीय संसद् व प्रदेशसभाया दुजः मतदाता दु । संघीय संसद् दुजःया मतभार ७९ व प्रदेशसभा दुजःया मतभार ४८ दु ।

नेपाःया संवैधाानिक प्रावधानकथं उपराष्ट्रपतिया स्वक्वःगुखुसि निर्वाचन जुइत्यंगु खः । मुलुक संघीय लोकतान्त्रिक शासन व्यवस्थाय् दुहाँ वनेधुंकाः न्हापांम्ह उपराष्ट्रपतिइ परमानन्द झा निर्वाचित जूगु खः । निगूगु निर्वाचनपाखें उपराष्ट्रपतिइ नन्दबहादुर पुन निर्वाचित जूगु खः ।

Categorized in राजनीति