नेवा: अनलाइन न्युज | २०८० भाद्र २५, सोमबार १२:५६:०१

येँया सिनामंगलय् च्वंगु त्रिभुवन विमानस्थलया भन्सार ज्याकुथिया ज्या थौं सोमवाःनिसें ठप्प जूगु दु । भन्सारय् ज्या यानाच्वंपिं कर्मचारीपिन्सं सामूहिक रुपं सरुवा यायेमाःगु धासें तःगु मागया सुनुवाई मजुइधुंकाः थौंनिसें भन्सारया ज्या ठप्प याःगु खः ।

सामूहिक सरुवालिसें न्यागू बुँदे माग तयाः आन्दोलनय् क्वाहाँ वःपिं कर्मचारीपिन्सं थौं सोमवाःनिसें त्रिभुवन विमानस्थल भन्सार ज्याकुथिया कार्गो जाँचपास शाखापाखें जुइगु निकासी, पैठारी सम्बन्धी सकतां ज्या बन्द याःगु खः । थौं नं माग सम्बोधन मजूसा मंगलवाःनिसें कार्गो शाखाया फुक्क ज्या बन्द यायेगु घोषणा याःगु दु ।

इमिसं आइतवाः स्वघौ पेनडाउन यानाः सांकेतिक विरोध न्ह्याकूगु खः । भाद्र २७ गतेतक नं माग सम्बोधन मयाःसा हाकनं मेगु चरणया आन्दोलनया ज्याझ्वः घोषणा यायेगु विमानस्थलया कर्मचारीपिन्सं अग्रीम जानकारी ब्यूगु दु ।

६० केजी लुँ तस्करी प्रकरणय् कर्मचारीपिं धमाधम ज्वनाः आतंकित याःगु इमिगु द्वपं दु । गुकिया हुनिं उगु भनसार ज्याकुथिइ ज्या यायेगु मनोविज्ञान व लकस मदूगु धासें वंगु भाद्र १२ गते १३७ म्ह कर्मचारीं सामूहिक सरुवा माग याःगु खः । तर, थःपिनिगु माग निवाः ई फुइधुंकूसां नं सुनुवाई मजुइधुंकाः आइतवाःनिसें इपिं आन्दोलनय् क्वाहाँ वःगु खः ।

Categorized in लजगाः