zero media family planning adv

थौंनिसें किपूया ९ वडा बादेय् गां कप ब्याडमिन्टन कासा न्ह्यात

नेवा: अनलाइन न्युज – ललेन्द्र शाक्य | २०७७ श्रावण १५, बिहिबार १३:०९:१७

किपूया ९ वडाय् लाःगु बादेय् गां क्लबया ग्वसालय् बादेय् गां कप ब्याडमिन्टन कासा थौं बिहिवाःनिसें न्ह्याःगु दु ।

थौं छगू ज्याझ्वःया दथुइ उगु बादेय् गां कप ब्याडमिन्टन कासाया उलेज्या किपू नगरपालिका ९ वडाया वडाध्यक्ष गंगाराम महर्जनं यानादीगु खः ।

किपूया ९ वडाया बादेय् गां त्वालय् लाःगु कीर्तिपुर माध्यमिक विद्यालयया ब्याडमिन्टन कोर्टय् जुनियर व सीनियर पुचःया दथुइ न्ह्याःगु उगु बादेय् गां कप ब्याडमिन्टन कासाय् त्वाःया थ्यंमथ्यं ५० म्ह कासामिपिन्सं ब्वति काःगु जानकारी ब्याडमिन्टन कासामि सुविन श्रेष्ठं बियादीगु दु ।

उगु ब्याडमिन्टन कासाया कजि लिसें ९ वडाया वडा दुजः प्रेमकृष्ण श्रेष्ठं कासा छवाःतक न्ह्याइगु जानकारी बियादीगु दु । कजि श्रेष्ठं बादेय् गां कप ग्वसाः ग्वयागु आज्जु धैगु त्वाःया युवा समुदायपिन्त कासाप्रति आकर्षित यानाः स्वस्थ व तन्दुरुस्त यायेत हःपाः व तिबः बिइगु खः धकाः धयादीगु दु । वय्कलं त्वाःया समग्र विकासया ज्याय् युवापिन्त सक्रिय व नुगः क्वसायेकेगु आज्जु नं बादेय् गां क्लबया दूगुलिं दकले न्हापांगु सुरुवात कथं बादेय् गां ब्याडमिन्टन कासा ज्याझ्वः न्ह्याकागु जानकारी नं बियादीगु दु ।

अथेहे, ब्याडमिन्टन कासामि हरिकृष्ण श्रेष्ठं त्वाःया युवावर्ग व युवावस्था पार यायेधुंकूपिं दाजुकिजापिनिगु न्हिथंया व्यायामया रुपं छ्यलाबुला याकेगु आज्जुं हे थुगु ब्याडमिन्टन कासाया ग्वसाः ग्वःगु खः धकाः धयादीगु दु ।

कासा उलेज्या ज्याझ्वः धुंकाः बादेय् गांया त्रिलोक श्रेष्ठं त्वाःया नां स्यंकाः बादेय् गां जुइमाःथाय् बाहिरी गाउँ धयाः वयाच्वंगुलिं त्वाःया बास्तविक नां बादेय् गां खः धकाः प्रचारप्रसार यायेगु आज्जुं नं बादेय् गां क्लब नीस्वनाः बादेय् गां कप ब्याडमिन्टन कासा ज्याझ्वः न्ह्याकागु जानकारी बियादीगु दु ।

थौंनिसें न्ह्याःगु उगु बादेय् गां कप ब्याडमिन्टन कासाय् त्वाःया अधिकांश युवावर्गलिसें युवावस्था पार यायेधुंकूपिन्सं ब्वति काःगु दु धकाः ग्वसाः खलः बादेय् गां क्लबं जानकारी ब्यूगु दु ।

किपाः अरिश श्रेष्ठ

Categorized in कासा