1142 nhoo dan adv

थौंनिसें ई–पासपोर्ट

नेवा: अनलाइन न्युज – ललेन्द्र शाक्य | २०७८ मङ्सिर १, बुधबार १२:३५:०१

सरकारं थौं बुधवाःनिसें विद्युतीय राहदानी (ई–पासपोर्ट) जारी यायेत ज्या न्ह्याकूगु दु ।

राहदानी विभागया त्रिपुरेश्वरय् च्वंगु न्हूगु भवनय् थौं बुधवाः न्हिनय् २ ता इलय् ग्वसाः ग्वइगु छगू ज्याझ्वलय् परराष्ट्रमन्त्री नारायण खड्कां ई–पासपोर्ट सार्वजनिक याइगु ज्याझ्वः दु ।

ई–पासपोर्ट अन्तर्राष्ट्रियस्तर् आः प्रचलनय् दु । अन्तर्राष्ट्रिय नागरिक उड्डयन प्राधिकरण (आईकाओ) पाखें ई–पासपोर्टयात सुरक्षित धकाः परिभाषित याःगु दु ।

आःतक नेपालं मेसिन रिडेबल पासपोर्ट (एमआरी) जारी यानाच्वंगु दु । आः ई–पासपोर्ट वितरण सुरु जुइगु विभागया प्रवक्ता शरदराज आरणं जानकारी ब्यूगु दु ।

विभागं मंसीर १ गतेनिसें आंशिक रुपं सुरु जुइगु ई–पासपोर्ट वितरण छवाःया दुने पूर्ण सेवाय् रुपान्तरण यायेगु योजना दयेकागु प्रवक्ता आरणं जानकारी ब्यूगु दु ।

प्रवक्ता आरणं धाःगु दु, ‘सुरुवातया छुं दिं जिमिसं न्हिथं सीमित जक ई–पासपोर्ट वितरण मजूतले विभागं अत्यावश्यक जुयाः वा स्वेच्छिक रुपं दयेके चाहेजूपिन्त एमआरपी नं वितरण यानाच्वनी ।’

एमआरपी प्रणालीया तथ्यांक न्हूगु प्रणालीइ सारेयायेत व छपाईया ज्या प्रभावकारी यायेत विभागं सुरुआतय् निगुलिं कथंया पासपोर्ट वितरण यायेगु तयारी याःगु खः ।

सन् २०२० या डिसेम्बर २० य राहदानी विभागं फ्रान्सया आईडीईएमआईए आइडेन्टी एण्ड सेक्युरिटीलिसे ई–पासपोर्ट छपाईया नितिं २ अर्ब ४८ करोड तकाय् खरिद सम्झौता याःगु खः । सम्झौता कथं झिलाया दुने कम्पनीं ई–पासपोर्टया वितरणया नितिं फुक्क ज्या क्वचायेकेमाःगु जूगु खः । विभागं आज्जु कथं हे इलय् हे ज्या क्वचाःगु दु धकाः धाःगु दु ।

ई–पासपोर्टय् राष्ट्रपतिया ज्याकुथि शितल निवासनिसें इलामया चिया बगानताया किपाःत तयातःगु दु ।

Categorized in बजाः