nepal investment baink

थुगु न्यागू लक्षण खनेदःसा सतर्क जुयादिसँ, ओमिक्रोनया संकेत खः

नेवा: अनलाइन न्युज | २०७८ माघ ६, बिहिबार १५:१७:२९

कोरोना भाइरसया डेल्टा भेरियन्ट संक्रमित ल्वगिपिंके उच्च ज्वरो वइगु, मदिक्क मुसु वइगु, छाती स्याइगु, साः ल्हाये थाकुइगु व अक्सिजनया मात्रा आकाझाकां म्हो जुइगु थेंजाःगु लक्षण खनेदूगु खः । तर ओमिक्रोनया छुं फरक लक्षण खनेदूगु दु ।

थ्व खः ओमिक्रोन संक्रमित जूगु न्यागू लक्षण :

आपालं थाकेजूगु महसुस जुइगु :

कोरोनाया न्हापांगु संस्करणत गथेकि, ओमिक्रोनं चरम थकान हयेफु । थकान व कम ऊर्जालिसें आपालं ई आराम यानाच्वने मन जुइगु जुइ । गुकिया हुनिं न्हिथं ज्या यायेत थाकुया वइ ।

अय्सां, थ्व ध्यान बिइत महत्वपूर्ण जू कि थ्व थकान मेमेगु हुनिं जुइफु । आपालं थाकेजूसा कोरोना जाँच यायेफइ ।

ककुइ ज्वनीगु :

ओमिक्रोनपाखें संक्रमित ल्वगिपिन्त ककु स्याइगु पलेसा ककु ज्वंगुथें अनुभव जुयाच्वंगु दु । गुगु असामान्य जू ।

ककु स्याइगु व ज्वनीगु समस्या आपालं समान जुइफु । ककुया च्वकाय् हिइसे च्वनीगु वा छुं जूगुथें महसुस जुइ सा ककु स्याःगु स्यानातुं च्वनी ।

हल्का ज्वरो :

ज्वरो कोभिड १९ या सामान्य लक्षणतमध्ये छगू खः । कोरोनाया न्हापांगु संस्करणय् हल्कानिसें उच्च ज्वरोतकया लक्षणत खनेदूगु खः । चिकित्सकया कथं ओमिक्रोनया ल्वगिपिन्त हल्का ज्वरो वःगु दु, गुगु थः हे लनावनी । दक्षिण अफ्रिकी स्वास्थ्य विभागं ओमिक्रोनं लक्षणय् निगू न्हूगु सुविधात थप जूगु दु, बहनी चःति व म्हगः स्याइगु ।

बहनी चःति वइगु :

ओमिक्रोन संक्रमित जूसा बहनी चःति थुलि अप्वः वइ कि छि ख्वाउँगु थासय् द्यंसां नं छिगु लँ वा लासायात प्याकाबिइ ।

सुख्खा मुसु :

ओमिक्रोनया ल्वगिपिन्त नं सुख्खा मुसु वइ । थ्व छगू लक्षण खः, गुगु आःतक कोरोनाया फुक्क स्ट्रेनतय्के खनेदूगु दु ।

सामान्यतयाः थ्व सुख्खा मुखु ककु स्याःगुलिसें वइ । आःतक उपलब्ध तथ्यांक कथं ओमिक्रोनय् हल्का लक्षण जक खनेदूगु दु ।

कोरोनाया न्हापांगु संस्करणय् खनेमदूगु ओमिक्रोन भेरियन्टय् छुं लक्षणत थप खनेदूगु दु ।

थ्व न्हूगु भेरियन्टय् गथेकि, ल्वगिपिन्सं नसाया स्वाद वा गन्ध गुमेयाइमखु, न त न्हाय् बन्द जूगु वा जूगुथें जाःगु लक्षणत महसुस यानाच्वंगु दइ ।

ओमिक्रोनया ल्वगिपिन्त आपालं ज्वरो नं वइमखु । ल्वगियाके सासःया समस्या नं खनेदइमखु ।