zero media family planning adv

थुगु दँ नं ख्वपया विस्काः जात्राय् रोक

नेवा: अनलाइन न्युज – ललेन्द्र शाक्य | २०७७ चैत्र २३, सोमबार ११:१८:१२

कोरोना संक्रमण ब्वलनीगु खतरा अप्वयेधुंकाः स्थानीय प्रशासनं ख्वपया लोकंह्वाःगु बिस्काः जात्राय् थुगु दँ नं रोक तःगु दु ।

स्थानीयपिन्सं बिस्काः जात्राय् सालीगु रथ निर्माणया ज्यायात निरन्तरता बियाच्वंगु इलय् स्थानीय प्रशासनं जात्राय् रोक तयेगु निर्णय याःगु खः ।

प्रमुख जिल्ला अधिकारी प्रेमप्रसाद भट्टराई नं यःसिं थनेगु व रथ सालेगु ज्या यायेत रोक तयागु जानकारी ब्यूगु दु । वं धाःगु दु, रथया पूजा यायेदइगु तर यःसिं थनेगु व रथ सालेगु ज्या मयायेगु निर्णय जूगु दु ।

प्यागोडा शैलीं स्वंगू तल्लाया तःजाःगु भैरवया रथयात सलंसः मनूतसें निगूलिं ब्वपाखें सालेगु बिस्काः जात्राया मू आकर्षण खः । बिस्काः जात्राय् स्वनिगःया येँ, यल व ख्वपया लिसेलिसें जःखःया जिल्लाया द्वलंद्वः मनूतय्गु सहभागिता दइगु खः ।

उगु भीडं कोभिड १९ या संक्रमण ब्वलनीगु भयावहया अवस्था वयेफूगु सम्भावना दूगुलिं थुगु दँया बिस्काः जात्राय् द्यःपालाःपिन्त जक तयाः पूजा यायेगु व रथ सालेगु लिसें यःसिं थनेगु ज्या वंगु दँय् थें मयायेगु प्रमुख जिल्ला अधिकारी भट्टराई नं धाःगु दु ।

वंगु दँ नं कोरोना संक्रमणया हुनिं स्थानीय प्रशासनं बिस्काः जात्राय् रोक तःगु खः । च्यान्हु व गुचा (९ रात)तक न्यायेकीगु बिस्काः जात्रा थुगु दँ चैत्र २८ गतेनिसें न्ह्याइगु खः ।

Categorized in स्थानिय-समाज