prabhu baink new

थाइल्याण्डय् संकटकाल घोषणा : नेतातलिसें २२ म्ह गिरफ्तार

नेवा: अनलाइन न्युज – ललेन्द्र शाक्य | २०७७ आश्विन २९, बिहिबार १४:४५:१०

थाइल्याण्डया जुजु जर्मनीपाखें लिहाँ वयेगु झ्वलय् प्रजातान्त्रिक अधिकारया नितिं धासें आन्दोलनरत् विद्यार्थी पुचलं जुजुविरुद्ध नाराबाजी याःगु खः । राजधानी बैंककय् हे जुजुविरोधी नारा थ्वयेकेधुंकाः सरकारं देय् न्यंकं संकटकाल घोषणा याःगु दु ।

शान्तिपूर्ण प्रदर्शन व तःधंगु भेला पनेत कडा संकटकालीन आदेश जारी याःगु विपक्षी नेतापिन्सं धाःगु दु । विपक्षी पुचलं प्रहरीं सुं सुं प्रभावशाली नेतालिसें २० म्हसिबें अप्वः मनूत गिरफ्तार याःगु धाःगु दु ।

नागरिक अधिकारया नितिं धासें इमिसं थौं बिहिवाः सुथनिसें प्रदर्शन याःगु खः ।

प्रहरीं सुं सुं प्रदर्शनकारीपिन्त गिरफ्तार यानागु स्वीकार याःगु दु । राष्ट्रिय प्रहरी प्रवक्ता यिंगग्युस थप्जुमनोंगं धाःगु दु, आन्दोलनकारीं थःगु गतिविधियात हिंसात्मक यायेधुंकाः शान्ति व सुब्यवस्था कायम यायेत कम्ती नं २२ म्ह प्रदर्शनकारीपिन्त नियन्त्रणय् कयाः प्रहरी हिरासतय् तयागु दु । माःगु अनुसन्धान लिपा इमित त्वःतेगु जुइ ।

थाइल्याण्डय् राजतन्त्र व राजपरिवारविरुद्ध न्वःवायेत व च्वयेत बन्देज यानातःगु कानूनी व्यवस्था दुसां नं प्रदर्शनकारीपिन्सं जुजु महा वाचिरालंकनविरुद्ध नारावाजी यायेधुंकाः सरकारं शान्ति व सुव्यवस्था कायम यायेत संकटकाल घोषणा यायेमाःगु धाःगु दु ।

युवापिन्सं प्रजातन्त्रया नितिं धासें यानाः वयाच्वंगु आन्दोलन थप हिंसात्मक जुइगु खनेदयेधुंकाः देसय् संकटकाल यायेमाःगुया विकल्प मखंगु सरकारी अधिकारीपिन्सं दावी याःगु दु ।

प्रदर्शनकारीपिन्सं प्रधानमन्त्रीया राजीनामा व जुजुया अधिकार कटौतीया माग यासें प्रदर्शन याःगु खःसा सरकारं देसय् शान्ति व सुव्यवस्था कायम यायेत संकटलकाल तयेमाःगु धाःगु दु ।

द्वलंद्वः विद्यार्थी व सरकारविरोधी कार्यकर्ता बैंककय् मुनाः शाही मोटर वनीगु मार्गय् हे अवरुद्ध यायेगु आज्जुं सतकय् क्वहाँ वयाः स्वपतिं ल्ह्वनाः सांकेतिक रुपं विरोध प्रदर्शन याःगु लिसें जुजु व सरकारया अधिकारी कटौती तकंया पक्षय् नाराबाजी याःगु खः ।

प्रदर्शनकारीपिन्सं नागरिकया अधिकारीया नितिं बैंककया सतकय् क्वाहाँ वयेत व आन्दोलनयात थप सशक्त यायेत आह्वान याःगु दुसा सरकारं इमित प्रदर्शनया नितिं भेला जुइके मबिइगु रणनीति कथं संकटकाल घोषणा याःगु खः ।

Categorized in अन्तर्राष्ट्रिय