nepal investment baink

थःम्हं म्हितूगु निगुलिं संकिपा “कान्स”य् छनोट जुइधुंकाः लुनिभाः तुलाधरया नुगलय् लसता

नेवा: अनलाइन न्युज – ललेन्द्र शाक्य | ने.सं. ११४४ बछलाथ्व पञ्चमी (२०८१ बैशाख ३० गते ) आइतवाः

अभिनेत्री लुनिभाः तुलाधरयात थुगु इलय् लसताया सीमा हे मदु । उगु लसता नं छगू जक मखु, निगू निगू ।

थुगु दँ लुनिभाः तुलाधरं अभिनय याःगु निगू संकिपा विश्व प्रसिद्ध “कान्स फिल्म फेस्टिभल”य् छनोट जूगु दु । कोन्स्टान्टिन बोजानोभ निर्देशित “द सेमलेस” फेस्टिभलया “अन सर्टेन रिगार्ड” विधाय् छनोट जूगु दु ।

येँय् सुटिङ जूगु उगु संकिपाय् लुनिभाः तुलाधरं छम्ह भारतीय कोठी संचालक भारतीय मिसाया भूमिकाय् अभिनय याःगु दु । लुनिभाः नं म्हितूगु नेपाली संकिपा “तारा : द लस्ट स्टार” नं “कान्स”या मार्केटिङ स्क्रिनिङय् छनोट जूगु दु । लुनिभाः नं थुकियात थःगु म्हगस पूवंगु अर्थय् काःगु दु ।

थःगु म्हगस पूवंगु धासें लुनिभाः तुलाधरं धाःगु दु, “जि म्वाये खंगु निम्ह सुन्दर पात्रत । थ्व धात्थें हे जिगु नितिं छगू अवीस्मरणीय अनुभूति खः । उत्साह, गर्व, व केवल स्नायुया स्पर्श याइगु मिश्रण । साम्तेन भुटियापाखें निर्देशित “तारा : द लस्ट स्टार” व कन्स्टेन्टिन बोजानो भपाखें निर्देशित “द सेमलेस” कान्सय् प्रदर्शनय् वःगु धयागु जिगु म्हगस पूवंगु खः ।”

लुनिभाः तुलाधरं थ्व हरेक पलया स्वाद कयाच्वनागु धाःगु दु । लुनिभाः नं धाःगु दु, “छम्ह अभिनेत्रीया रुपं जितः वय्कःपिनिगु दृष्टिकोण व विश्वासया नितिं जि निम्हं निर्देशकप्रति कृतज्ञ जुयागु दु । थ्व गर्मया क्षण खः, गुकिं थ्व संकिपाय् यानागु कडा परिश्रम, समर्पण व जोशयात प्रमाणित याइ । जिं थुगु अविश्वसनीय उपलब्धीया हरेक पलया स्वाद कयाच्वनागु दु । विश्वलिसे थुगु बाखं इनेगु ह्वताःया नितिं कृतज्ञ जुयागु दु । छेँजः, पासापिं व ब्रम्हाण्डयात सुभाय् ।”

तर भिजा प्रक्रियाय् ढिलाइ जुइगु जुइधुंकाः थः कान्सय् अनुपस्थित जुइगु लुनिभाः तुलाधरं धाःगु दु । ज्याया खँ ल्हायेबलय् लुनिभाः नं याकनं हे सिमोस सुनुवारं निर्देशन याइगु अभिनय सम्बन्धी छगू रियालिटी शोलय् जजया रुपं ज्या याइगु जूगु दु ।

 

Categorized in कला