zero media family planning adv

थःगु हे न्हापांगु म्येया म्यूजिक भिडियोय् म्येहालामि एरोन भन्ते जुल

नेवा: अनलाइन न्युज – ललेन्द्र शाक्य | २०७७ चैत्र १८, बुधबार १२:५८:२४

छम्ह मां नं छम्ह मचा बुइकेत गुलि कष्ट सास्ती नइ, व सुनां सीमखु । स्वयं मां नं जक सी । थःत बुइकूम्ह मां नं थः जन्म जुइगु नितिं फयेमाःगु कष्ट सास्तीयात नुगलय् तयाः अले मांयात द्यः भाःपियाः छम्ह मचां मांया भक्तिभाव लिसें मांया गुणगान यानातःगु नेपालभाषा ख्यलय् छगू बिस्कं पहःया मचाम्येया सुटिंग ज्याझ्वः ने.सं. ११४१ चिल्लागा द्वितीया (चैत्र १७ गते) मंगलवाःनिसें न्ह्याःगु दु ।

किपूया ९ वडा तगःवपि बाहिगामय् च्वंम्ह न्हूप्रतिभा मचा म्येहालामि एरोन महर्जनया सलं थ्वयाच्वंगु व किपूया हे २ वडा द्यःध्वाखा त्वालय् च्वंम्ह भुवन महर्जनया च्वसां व लसं पिज्वःगु मां शीर्षकया ...सास्ती नयाः प्वाथय् तयाः, स्याःगु कष्ट सहयाना, पलाः तयेकल, मिखां खंकल, थ्व स्वर्गया धरती जितः...यःमां...यःमां...यःमां...बोलया म्येया म्यूजिक भिडियोया सुटिंग ज्याझ्वः मंगलवाःनिसें न्ह्याःगु खः ।

थुगु म्येया संगीत संयोजन नेपाःया लोकसंगीत ख्यलय् अतिकं लोकंह्वाःम्ह संगीत सर्जक मदुम्ह रामशरण नेपालीया छय् व नेपाःया संगीत ख्यलय् लोकंह्वाःम्ह सारंगीवादकलिसें भ्वायलिनबादक संगीतकःमि श्याम नेपालीया काय् प्रिन्स नेपालीं यानादीगु खःसा बाजं नांजाःगु फ्युजन ब्याण्ड कुटुम्ब ब्याण्डया संगीतकःमिपिन्सं थानादीगु दु ।

मुक्कं किपू लागाय् जक सुटिंग न्ह्यानाच्वंगु मां शीर्षकया म्ये वइगु चैत्र २१ गते शनिवाः सुटिंग ज्याझ्वः क्वचाइगु जानकारी थुगु म्येया च्वमि व लय् चिनामि भुवन महर्जनं बियादीगु दु । भाजु महर्जनं बि.सं. २०७८ साल न्हूदँ व रामनवमी नखःया लसताय् लाकाः थुगु मां शीर्षक म्येया म्यूजिक भिडियो छगू समारोह यासें सार्वजनिक यायेगु जानकारी नं बियादीगु दु ।

नेपालभाषा चिहा संकिपा ख्यलय् न्हूगु सोंच ज्वनाः पलाः न्ह्याकाः वयाच्वंम्ह योवन शाक्यया निर्देशन व सम्पादनय् निर्माण जुयाच्वंगु मां म्यूजिक भिडियोया क्यामेरा पर्सन रक्की महर्जन खः ।

सुटिंग न्ह्यानाच्वंगु मां म्येया म्यूजिक भिडियो म्येहालामि एरोन महर्जन स्वयं अभिनय यानादीगु दुसा थुगु म्यूजिक भिडियोय् मूपात्र कथं एरोन महर्जनं छम्ह भन्तेया भूमिका म्हितादीगु दुसा थौंकन्हय् नेपालभाषा संकिपा व म्यूजिक भिडियो ख्यलय् लोकंह्वानाः वयाच्वंम्ह किपूया हे म्ह्याय् मचा कलाकार सरीता बज्राचार्यलिसें मोडल किपाः श्रेष्ठ व स्वदँ दुम्ह किपूया हे मचा कलाकार समीक्षा बज्राचार्यपिनिगु मू भूमिका दु धकाः मां म्यूजिक भिडियोया निर्देशक योवन शाक्यं जानकारी बियादीगु दु ।

किपूया १ वडा बाघभैरवव परिसरय् च्वंगु हिलटाउन उच्च माध्यमिक विद्यालयस न्यागू तगिंतक ब्वनाः लकडाउन लिपा आइडियल मोडल स्कूलय् खुगू तगिमय् ब्वनाच्वंम्ह न्हूप्रतिभा मचा म्येहालामि एरोन महर्जन हिलटाउन स्कूलय् अध्ययनलिसेलिसें अतिरिक्त क्रियाकलापया थीथी विधा व संगीत ख्यःया नं छम्ह उत्कृष्ट विद्यार्थी खः धकाः एरोनया अभिभावकपिं राज्यलक्ष्मी व जनक महर्जनं कनादीगु दु ।

न्हूप्रतिभा मचा म्येहालामि एरोन महर्जनया मां शीर्षकया न्हापांगु म्येया म्यूजिक भिडियो नेपालभाषा म्यूजिक भिडियो ख्यलय् बिस्कं पहःया न्हू सवाःया म्यूजिक भिडियो जुइगु मां म्यूजिक भिडियो निर्माण पुचलं जानकारी ब्यूगु दु ।

Categorized in कला