नेवा: अनलाइन न्युज – ललेन्द्र शाक्य | २०७८ जेठ १, शनिबार १३:२२:५६

लिपांगु इलय् भारतीय संचारमाध्यमय् मृत्युया अफवाह ब्वलंकेगु क्रम जारी जुयाच्वंगु दु ।

छुं दिं न्ह्यः जक भारतीय अभिनेत्री मिनाक्षी शेष्रादी, महाभारतया भिष्म पितामह मुकेश खन्नाया सामाजिक संचालय् मृत्युया खबर वयेधुंकाः फुक्कसिनं श्रद्धाञ्जलि ब्यूगु खः । तर, लिपा इपिं थःपिन्सं हे थःपिं म्वानाच्वंगु पुष्टि याःगु खः ।

अथेहे, हाकनं म्हिगः शुक्रवाः बलिउडया कलाकार परेश रावलयात सामाजिक संजालय् श्रद्धाञ्जलि ब्यूगु दु । श्रद्धाञ्जलिया लिसः परेश रावल थःम्हेस्यां हे अतिकं न्ह्याइपूगु तरिकां ब्यूगु दु ।

म्हिगः शुक्रवाः लाफर हाउस नांया पेजपाखें परेश रावलयात ब्यूगु श्रद्धाञ्जलिइ च्वयातःगु दु, ‘थौं सुथय् ७ ता इलय् बलिउडया छगू भाग परेश रावलया मृत्यु जूगु दु ।’

उगु पोष्टयात शेयर यासें अभिनेता रावलं च्वःगु दु, ‘छिगु गलत धारणाया जिं माफी फ्वने, ७ ता ईलिपा नं जि देनाच्वनागु खः ।’

रावल सामाजिक संजालय् अतिकं सक्रिय जुयाच्वंगु दु । थःगु ट्वीटपाखें फ्लोअर्सलिसे खँल्हाबल्हा यानाच्वंगु दु । रावल आः बक्सिङ कोचया भूमिकाय् ‘तुफान’ संकिपाय् खनेदयेत्यंगु दु । थ्व संकिपाया रिलिज कोरोनाया हुनिं स्थगित जुयाच्वंगु दु ।

Categorized in कला