Header Nepal rastra bank Adv

त्रिवि सेवा आयोगं काःगु १०४ पदया लिखित परीक्षाय् फुक्क फेल !

नेवा: अनलाइन न्युज – ललेन्द्र शाक्य | २०७९ आषाढ १५, बुधबार १५:२२:०४

त्रिभुवन विश्वविद्यालय सेवा आयोगं काःगु प्रशासनिक व प्राविधिकपाखेया १०४ पदया परीक्षाय् फुक्क परीक्षार्थी फेल जूगु दु ।

आयोगं मंगलवाः सार्वजनिक याःगु उपप्रशासक, शाखा अधिकृत, मुख्य ज्याकुथि सहायक, आर्थिक उपनियन्त्रक व लेखा अधिकृत पदया खुल्लापाखेया परीक्षाय् छम्ह नं परीक्षार्थी पास जूगु मदु ।

उपप्रशासक पदय् प्यम्हेसिगु माग यानातःगुलि झिंनिम्हेस्यां लिखित परीक्षा ब्यूगु खः । शाखा अधिकृतय् पीगू (४० गू) पदया नितिं ५४२ म्ह, मुख्य ज्याकुथि सहायकय् पीस्वंगू (४३) पदया नितिं ७७७, आर्थिक उपनियन्त्रकय् निगू पदया नितिं स्वम्ह, लेखा अधिकृत झिंन्यागू (१५) पदया नितिं १२९ म्हेस्यां परीक्षा ब्यूगु खः । तर उगु पदय् छम्ह नं परीक्षार्थी पास मजूगु खः ।

परीक्षाय् मर्यादा अःखः गतिविधि याःपिं १३८ म्हेसिगु परीक्षा रद्द याःगु नं आयोगं जानकारी ब्यूगु दु । लेखा सहायक, मुख्य लेखा सहायक व ज्याकुथि सहायकय् धाःसा परीक्षार्थी पास जूगु दु ।

२०७७ कार्तिक २८ गतेनिसें मंसीर १६ गतेतक व माघ २५ गतेनिसें फागुन २७ गतेतक काःगु प्रशासनिक व प्राविधिक पदया परीक्षाया लिच्वः सार्वजनिक याःगु खः ।

पास जूपिं परीक्षार्थीपिनिगु प्रयोगात्मक परीक्षा व अन्तर्वार्ता थ्वहे असार २८ गते त्रिवि इन्जिनीयरिङ अध्ययन संस्थान, सूचना व संचार प्रविधि केन्द्र पूच्वय् सुथय् ११ ता इलय् जुइगु आयोगं जानकारी ब्यूगु दु ।

Categorized in लजगाः