नेवा: अनलाइन न्युज | २०८० भाद्र ३१, आइतबार १५:१३:१२

येँया तीनकुनेय् शुक्रवाः चान्हय् जूगु सामूहिक हत्याय् दुथ्याःम्ह थप छम्हेसित प्रहरीं ज्वंगु दु ।

उपत्यका अपराध अनुसन्धान ज्याकुथि व जिल्ला प्रहरी परिसर येँया पुचलं छम्हेसित ज्वंगु प्रहरी उच्च स्रोतं पुष्टि याःगु दु । अयसां प्रहरीं ज्वंम्हेसिगु नां व घटनाया हुनिं सार्वजनिक याःगु मदुनि ।

तीनकुनेय् च्वंगु दिव्य सःमिल दुने ज्वःगु ल्वाभः प्रहार यानाः हत्या यानातःगु अवस्थाय् छगू हे छेँजःया स्वम्ह लिसें प्यम्हेसिगु सीम्ह लुयावःगु खः ।

सीपिं दोलखा छेँ दुम्ह थ्यंमथ्यं ५५ दँया कुमार भुजेल, वया कलाः शुभद्रा वाइवा व कुमारया मां ७५ दँया सुमित्रा भुजेल व मोरङ छेँ दुम्ह थ्यंमथ्यं १९ दँया नवीन राई खः ।

इमिगु म्हगःया थीथी थासय् ज्वःगु ल्वाभः प्रहार जुयाः तच्वकं घाःपाः जुयाच्वंगु खः ।

उगु घटनाय् दुथ्याःगु आशंकाय् प्रहरीं थ्वसिबें न्ह्यः २८ दँया दीपेन्द्र राईयात ज्वंगु खः । उपत्यका प्रहरी ज्याकुथि रानीपोखरीया प्रमुख एआईजी दीपक थापाया कथं राईयात वसः व लाकामय् हि किनाच्वंगु अवस्थाय् ज्वंगु खः ।

प्रहरी स्रोतया कथं राई बहनी मिल दुने हे च्वंगु खः । प्रहरी अधिकृतपिनिगु कथं राई चान्हय् थ्यंमथ्यं १२ः३० ता इलय् थःहे ट्याक्सी गयाः तीनकुनेय् च्वंगु प्रहरी वृत्त न्हूबानेश्वर थ्यंकूगु खः ।

घटनास्थलं हडबडेजुयाः सकतय् पिहाँ वःम्ह राई नं ट्याक्सी नापलाये धुंकाः तीनकुनेया प्रहरी चौकीइ थ्यंकाः बिइत धाःगु खः । लिपा व हे शंकाया घेराय् लाःगु खः ।

Categorized in दुर्घटना-अपराध