prabhu baink new

तिनकुनेया तरकारी बजारं ४२ बोरा प्याज बरामद

नेवा: अनलाइन न्युज – ललेन्द्र शाक्य | २०७७ आश्विन १, बिहिबार १४:४४:२९

येँ महानगरपालिकाया उपभोक्ता हित संरक्षण समितिं येँया तिनकुनेया छगू तरकारी बजारं ४२ बोरा प्याज जफत यानाः प्रहरीया जिम्मा ब्यूगु दु ।

तीनकुनेया हरितगृह तरकारी बजारय् बिहिवाः सुथय् छड्के अनुगमन याःबालय् ब्यापारीं सुचुकाः तःगु प्याज बरामद याःगु खः ।

विशेष गौतमया पसलं २९ व उन्नत सब्जी भण्डारीं १३ बोरा प्याज जफत याःगु अनुगमन समितिया दुजः उपभोक्ता अधिकारकःमि माधव तिमिल्सिनां जानकारी ब्यूगु दु ।

अथेहे, वहे तरकारी बजारं थिके यानाः प्याज म्यूगु द्वपनय् दुलाल आलु प्याजया संचालकयात नं समितिं कारवाही सिफारिस याःगु दु ।

अनुगमनय् लाःपिं फुक्कसित वाणिज्य विभागय् सःतूगु खः । इमित उपभोक्ता हित संरक्षण ऐन कथं कारवाही जुइगु धाःगु दु ।

भारतं प्याज निर्यात बन्द यायेधुंकाः नेपाःया बजारय् व्यापारीपिन्सं प्याजया कृत्रिम अभाव ब्वलंगु खः ।

Categorized in बजाः