nepal investment baink

तिंख्यलय् जूगु सीप मेलाय् तालिम कायेत ४३ हजारसिबें अप्वःया आवेदन

नेवा: अनलाइन न्युज – ललेन्द्र शाक्य | ने.सं. ११४४ बछलाथ्व सप्तमी (२०८१ जेष्ठ २ गते) बुधवाः

येँ महानगरपालिकां न्ह्याकाः वयाच्वंगु थीथी निःशुल्क सीप तालिम कायेत ६८ हजार ८ सय ६६ म्हेस्यां आवेदन ब्यूगु दु । वमध्ये तिंख्यलय् जुयाच्वंगु सीप मेलाया नितिं जक ४३ हजार ५८ म्हेस्यां आवेदन ब्यूगु येँ महानगरं जानकारी ब्यूगु दु ।

२०८१ म्हेसित तालिम बिइगु व तालिम काःपिन्त रोजगार बिइगु आज्जु लिसें बैशाख १९ गतेनिसें न्ह्याःगु मेलाय् निःशुल्क तालिम कायेत मंदुपिनिगु नितिं येँ महानगरं आवेदन आह्वान याःगु खः ।

तिंख्यलय् न्ह्यानाच्वंगु सीप मेलाय् थीथी झिगू क्षेत्रया स्वीगू विधालय् सीप तालिम बियाच्वंगु दु ।

येँ महानगर गौरव योजना अन्तर्गत चालु आर्थिक दँय् झिंन्याद्वःम्हेसित निःशुल्क तालिम बिइगु व तालिम काःपिंमध्ये न्याद्वःम्हेसित रोजगार वा स्वरोजगारय् आबद्ध याकेगु आज्जु दूगु सहरी योजना आयोगया दुजः इञ्जीनियर शैलेन्द्र झा नं जानकारी ब्यूगु दु । वं तालिमया नितिं अनलाइन फर्मपाखें आवेदन कयाच्वनागु धाःगु दु ।

वं धाःगु दु, “थुज्वःगु आवेदनयात नां थर, मोवाइल ल्याः, नागरिकता ल्याः, थाय् बाय् थें जाःगु सूचकया आधारय् छम्हेसित  छगू हे जक तालिमया नितिं ल्ययेगु जुइ ।”

झाया कथं हरेक वडापाखें सच्छिम्हेसित सहभागी याकेत फाराम छ्वयागु खः । थुकिया धलः अद्यावधिक जुयाच्वंगु दु । सीप मेलाया नितिं नं सुरुइ अनलाइन आवेदन जक कायेगु धाःगु खः । तर आपालं ल्याखय् आवेदकपिन्सं मेला जूगु थासय् हे फाराम भरेयायेदइगु माग तःगुलिं इमिगु माग कथं तिंख्यलय् हे नं फाराम भरेयायेगु ह्वताः बियागु महानगरं जानकारी ब्यूगु दु ।

सीप मेलाया लिपांगु निन्हुया दिं रोजगार मेला नं जुइ । थुगु दिं रोजगारदाता स्टलय् हे वइगु व तालिम काःपिन्त ल्यज्या यानाः रोजगारी बिइगु महानगरं जानकारी ब्यूगु दु ।

महानगरं धाःगु दु, “थ्वहे थासं आपालं बेरोजगारं रोजगार कायेखनीगु जूगु दु । रोजगारदातापिन्सं सीपयुक्त जनशक्ति प्राप्त यायेखनी ।”

Categorized in लजगाः