nepal life 2076 3 18

तालिवान थ्यंकल अफगानिस्तानया राजधानी काबुलय्

नेवा: अनलाइन न्युज – ललेन्द्र शाक्य | २०७८ श्रावण ३१, आइतबार १४:५२:००

अफगानिस्तानया राजधानी सहर काबुलय् चरमपन्थी संगठन तालिवानया लडाकु दुहाँवंगु दु ।

अफगानिस्तानया गृहमन्त्रालयया अधिकारीपिन्सं तालिवानया लडाकु काबुलय् दुहाँवंगु जानकारी ब्यूगु अन्तर्राष्ट्रिय समाचार एजेन्सी रोयटर्सं न्ह्यथंगु दु ।

अमेरिकां हेलिकोप्टरपाखें काबुलय् च्वंपिं थः नागरिकपिनिगु उद्धार यायेगु पलाःया लिसें तालिवानया लडाकु सहरय् दुहाँवःगु खः । बुखँय् न्ह्यथनातःकथं आः सहरया प्यख्येंरै तालिवानया लडाकु दुहाँवःगु मन्त्रालयया छम्ह बरिष्ठ अधिकारीं धाःगु दु । तर, थुगु विषयस विस्तृत जानकारी धाःसा ब्यूगु मदुनि ।

अफगानिस्तानया प्रेसिडेन्टल प्यालेसया ट्वीटर एकाउन्टपाखें काबुलया आपालं थासय् गोली चलेजूगु तायेदूगु पोस्ट याःगु दु । अयसां अफगानिस्तानया सुरक्षाकःमिं सरकारयात नियन्त्रणय् तःगु उगु पोस्टय् न्ह्यथनातःगु दु ।

तालिवानं अफगानिस्तानय् थःपिनिगु कब्जा अप्वयेकाः यंकेगु ज्याया लिसें अमेरिकां थप सैनिक छ्वसें थः नागरिकपिन्त ग्वाहालि यायेगु धाःगु दु । अथेहे, नेटोया अधिकारीं युरोपेली संघ (ईयू)या आपालं कर्मचारीपिन्त राजधानीया सुरक्षित थासय् यंकागु धाःगु दु ।

तालिवानया छम्ह अधिकारीं थःपिन्सं छुं युद्ध चाहेमजुयागु धाःगु दु तर संगठनया पाखें युद्धविरामया घोषणा धाःसा जूगु मदुनि । थ्वसिबें न्ह्यः तालिवानं आइतवाः सुथय् जलालाबादयात थःपिनिगु नियन्त्रणय् काःगु खः ।

Categorized in अन्तर्राष्ट्रिय