coved ad

तालिवानया नियन्त्रणय् मवःगु पञ्चशिर उपत्यकाय् भीषण युद्ध

नेवा: अनलाइन न्युज – ललेन्द्र शाक्य | २०७८ भाद्र १८, शुक्रबार १५:३७:५२

अफगानिस्तानय् तालिवानया नियन्त्रणय् मवःगु छगू जक प्रान्त पञ्चशिरय् तालिवान व स्थानीय नेशनल रेसिस्टेन्स फ्रन्ट (एनआरएफ) दथुइ भीषण युद्ध जुयाच्वंगु दु । तालिवानं उगु प्रान्तया छुं भागयात थःगु नियन्त्रणय् काःगु व एनआरएफपाखे तःधंगु क्षति जूगु दाबी याःगु दु ।

अय्सां एनआरएफं धाःसा उगु उपत्यकाया फुक्क प्रदेशद्वारय् थःपिनिगु बल्लाःगु उपस्थिति दूगु व तालिवानया सच्छिम्हसिबें अप्वः लडाकु स्यानागु धाःगु दु । पञ्चशिर प्रान्त थ्वसिबें न्ह्यः नं गुबलें तालिवानया नियन्त्रणय् वःगु मदु । थ्व प्रान्तय् तःधंगु ल्याखय् लडाकुपिं तैनाथ यानातःगु विश्वास काःगु दु ।

एनआरएफय् अफगानिस्तानया पूर्व उपराष्ट्रपति अमरुल्लाह सालेह नं सामेल दु । अफगानिस्तानया पूर्व सैनिक व स्थानीय लडाकुपिन्त पञ्चशिरया स्थानीय नेता अहमद मासुदं नेतृत्व यानाच्वंगु दु । मासुदया अबुं सन् १९८० या दशकय् सोभियत संघ व १९९० या दशकय् तालिवानविरुद्ध वीरतापूर्वक युद्ध ल्वाःगु खः ।

तालिवानया प्रवक्ता जबिउल्लाह मुजाहिदं वार्ता असफल जुइधुंकाः लडाकुपिं आः पञ्चशिर उपत्यकापाखे वंगु धाःगु दु । तालिवान व पञ्चशिरया नेता निगू ब्यागलं ध्रुवय् दनेधुंकाः वार्ता असफल जूगु अन्तर्राष्ट्रिय संचारमाध्यमतसें धाःगु दु ।

बुखँय् न्ह्यथनातःकथं एनआरएफं पञ्चशिरय् जारी युद्धय् ३५० तालिवानया लडाकु स्याःगु दाबी याःगु दु । अय्सां थ्व ल्याः पुष्टि धाःसा जूगु मदुनि ।

Categorized in अन्तर्राष्ट्रिय