nepal life 2076 3 18

तालिवानया क्याबिनेटय् बुद्धमूर्ति ध्वस्त याःपिंनिसें आतंकवादी घोषितपिं तक

नेवा: अनलाइन न्युज – ललेन्द्र शाक्य | २०७८ भाद्र २३, बुधबार ०९:४३:१८

अफगानिस्तानय् बन्दुकया बलय् सत्ता कब्जा याःम्ह तालिवानं मुल्लाह मोहम्मद हसन अकुन्डया नेतृत्वय् क्याबिनेट घोषणा याःगु दु । क्याबिनेटय् सुं नं मिसा दुजः मदु । फुक्क कट्टरपन्थीपिं जक दु ।

तालिवान सरकारया अन्तरिम प्रधानमन्त्री अकुन्ड हलिंया हे दकले विशाल बमियानया बुद्धमूर्ति ध्वस्त यायेत आदेश ब्यूम्ह खः । सन् २००१ स विश्व सम्पदा बामियानया बुद्धमूर्ति ध्वस्त यायेधुंकाः तालिवानया हलिंन्यंकं हे आलोचना जूगु खः । मुल्लाह हसन संयुक्त राष्ट्र संघया आतंकवादीया धलखय् दु । हसन सर्वाधिक खोजीइ लाःम्ह आतंकवादी मध्येया छम्ह खः ।

अन्तरिम प्रधानमन्त्रीया दौडय् मुल्लाह हसन व मुल्लाह गनी खः । गनी कतारय् च्वंगु तालिवानया राजनीतिक ज्याकुथिया प्रमुख खः । तर, थुपिं निम्ह दथुइ प्रधानमन्त्रीया विवाद मिलेयायेत पाकिस्तानया खुफिया एजेन्सी आइएसआई प्रमुख जनरल फैज हमिद काबुल थ्यंकूगु खः ।

आइएसआई प्रमुख हमिदं तालिवान दुने शक्ति संघर्षय् सहमति यानाबिल । पाकिस्तानया तालिवान सरकारय् भूमिका प्रष्ट खनेदूगु दु । आतंकवादी गतिविधिइ लाःगु हक्कानी नेटवर्क व कान्दाहार आधार दयेकूम्ह तालिवानया समूह न्हूगु क्याबिनेटय् हावी खनेदु । दोहाय् च्वनाः तालिवानया अन्तर्राष्ट्रिय प्रभाव व समन्वयस भूमिका म्हितूपिन्त छखे लाकूगु दु ।

३३ म्ह क्याबिनेट दुजःपिंमध्ये २० म्ह कान्दाहार केन्द्रीत तालिवान समूह दु । ३३ म्हमध्ये स्वम्ह जक पुस्तु समुदाय पिनेया दु ।

Categorized in अन्तर्राष्ट्रिय