nepal life 2076 3 18

तालिवानयाके फाइटर प्लेन, ड्रोननिसें अत्याधुनिक चीधंगु ल्वाभःतक

नेवा: अनलाइन न्युज – ललेन्द्र शाक्य | २०७८ भाद्र १३, आइतबार १५:१८:०२

अफगानिस्तानया राजधानी काबुलयात तकं नियन्त्रण कायम यायेधुंकाः तालिवान संसारया उज्वःगु अतिवादी समूह जूगु दु, गुम्हेसिके हवाई फौज तकं दु । अफगानी सेनां आत्मसमर्पण यायेधुंकाः तालिवानया नियन्त्रणय् युद्धक हेलिकोप्टर निसें अत्याधुनिक ल्वाभः तकं थ्यंगु दु ।

अमेरिकां अफगानी सेनायात ब्यूगु अत्याधुनिक ल्वाभः नं तालिवानया कब्जाय् थ्यंगु दु । अमेरिकी पूर्वसैनिक अधिकारी तकं जुयाच्वंम्ह रिपब्लिक सांसद जिम ब्याक्सया कथं ८५ अर्ब डलर बराबरया अमेरिकी ल्वाभः तालिवानया पहुँचय् थ्यंगु दु । गुगुमध्ये ७५ हजार सैनिक सवारीसाधन, निसः सिबें अप्वः विमान व हेलिकोप्टर, ६ लखसिबें अप्वः ल्वाभः दु ।

तालिवानयाके संसारया ८५ प्रतिशत देससिबें अप्वः ब्लाक हक हेलिकोप्टर दु । स्क्यान इगल सैन्य ड्रोन तकं तालिवानया नियन्त्रणय् थ्यंगु दु ।

सन् २००२ निसें २०१७ या दथुइ अमेरिकां अफगानिस्तानया सैनिकया नितिं २८ अर्ब डलरया ल्वाभः ग्वाहालि याःगु खः । गुगुमध्ये बन्दुक, रकेट, ड्रोन लिसेंया दु । सन्. २००३ निसें २०१६ या दथुइ अमेरिकां अफगान फौजयात २०८ युद्धक विमान व हेलिकोप्टर ब्यूगु खः । थ्व अमेरिकाया गभर्नमेन्टर एकाउन्टाबिलिटी अफिसया तथ्यांक खः । ५० गः सैन्य विमान अफगान पाइलटपिन्सं शरण कासें उज्वेकस्तानय् थ्यंकूगु खः । काबुलयात नियन्त्रण कायेन्ह्यः हे तालिवानं पाइलटपिनिगु हत्याया अभियान हे न्ह्याकूगु खः ।

संसारया शक्तिशाली देसतय्के दूगु बराबरया ल्वाभः तालिवानया ल्हातय् थ्यंगु दु । पश्चिमा देसतसें अनुमान याःगुसिबें याकनं हे काबुल कब्जा याःगुलिं अप्वःसिबें अप्वः ल्वाभः तालिवानया ल्हातय् थ्यंगु खः ।

दुश्मनया ल्वाभः कब्जा याःगु गुरिल्ला रणनीति खः । तालिवानं थ्वहे रणनीति छ्यल । इमिसं अमेरिकालिसें पश्चिमा गुप्तचरया सुचंयात हे गलत सावित जुइगु कथं झिन्हुया दुने हे काबुलयात नियन्त्रणय् काःगु खः ।

अमेरिकी ल्वाभः कब्जा यायेधुंकाः तालिवान सैनिक अत्याधुनिक ल्वाभःलिसें काबुलय् खनेदूगु दु । इमिसं एम फो कार्बिन्स व एम १६ राइफल ज्वनातःगु खनेदु ।

अमेरिकी सैनिकं अफगानी सेनाया नितिं ब्यूगु अत्याधुनिक ल्वाभः तालिवानया ल्हातं इस्लामिक अतिवादी समूहया ल्हातय् थ्यनीगु खतरा तकं अप्वःगु दु ।

अफगानिस्तानं मध्यपूर्व, अफ्रिकी देसया लिसेलिसें दक्षिण व दक्षिणपूर्वी एसियाया अतिवादी समूहया ल्हातय् ल्वाभः थ्यन धाःसा अशान्ति ब्वलनेफु ।

तालिवानयाके सैनिक विमान व हेलिकोप्टर ब्वयेकेत माक्व पाइलटया अभाव दु । अत्याधुनिक ल्वाभः चलेयायेफुपिं योद्धाया नं कमी दु । उकिं नं ल्वाभःया दुरुपयोग जुइफु ।

Categorized in अन्तर्राष्ट्रिय