swastha 3

तालिवानं मिसापिन्त ब्वंके बिइगु, मिजंपिंलिसे छगू हे कक्षाय् मतइगु

नेवा: अनलाइन न्युज – ललेन्द्र शाक्य | २०७८ भाद्र २९, मंगलबार १३:००:३५

अफगानिस्तानय् तालिवानी समूह नं मिसापिन्त नं अध्ययनया नितिं विश्वविद्यालय वनेत अनुमति बिइगु निर्णय याःगु दु । तालिवानया सत्ता वयेधुंकाः मिसापिन्त विश्वविद्यालय वनेत प्रतिबन्ध तइगु आशंकाया दथुइ इमिसं विश्वविद्यालय वनेदइगु धाःगु खः ।

तर, छगू हे कक्षा कोथाय् मिसा व मिजंपिन्त नापं तये धाःसा मदइगु तालिवान सरकारया उच्च अधिकारीपिन्सं जानकारी ब्यूगु दु । विश्वविद्यालयस मिसापिन्त मिजंपिंसिबें ब्यागलं तयेत तालिवान सरकारया न्हूम्ह शिक्षामन्त्रीं निर्देशन ब्यूगु दु ।

विश्वविद्यालयस मिसापिन्त नं छ्वयेगु निर्णययात तालिवानया थ्वसिबें न्ह्यः सन १९९६ निसें २००१ तकया शासन व्यवस्थासिबें लचक जुइगु संकेतया रुपं काःगु दु । न्हापांगु शासनकालय् अफगानिस्तानय् मिसा व मिसामचापिन्त विश्वविद्यालय व विद्यालयस वनेत प्रतिबन्ध तःगु खः ।

विश्वविद्यालययात लिंगया आधारय् वसः सम्बन्धी न्हूगु नियम लागु नं यायेगु तालिवानं जानकारी ब्यूगु दु । उच्च शिक्षासम्बन्धी मन्त्री अब्दुल बाकी हक्कानीं विद्यार्थीपिन्त अध्यापन याकेगु विषयया समीक्षा यायेगु नं जानकारी ब्यूगु दु ।

तालिवानं मिसापिन्त शिक्षा व रोजगारीइ प्रतिबन्ध मतयेगु जानकारी ब्यूगु दु । तर, वंगु अगस्त १५ स सत्ता थःपिनिगु ल्हातय् कायेधुंकाः तालिवानं सुरक्षा अवस्थायाय् सुधार मवःतलेतक स्वास्थ्यकर्मीबाहेक मेमेपिं मिसापिन्त ज्यापाखें तापाक्क हे च्वनेत निर्देशन ब्यूगु दु ।

तालिवानया न्हापांगुखुसिया थःपिनिगु शासनकालय् सिबें छुं लचक जूसां नं निवर्तमान सरकारसिबें आःया सरकार कठोर खनेदूगु दु ।

तालिवानं थ्यंमथ्यं लच्छि न्ह्यः निर्वाचित सरकारयात अपदस्थ यानाः सत्ता कब्जा याःगु खः । प्रदेश राजधानीत कब्जा यायां केन्द्रीय राजधानी कब्जा यायेगु पलाः न्ह्याकेधुंकाः तत्कालीन राष्ट्रपति अशरफ घानीं देय् त्वःताः बिस्यु वनेधुंकाः सत्ता तालिवानया ल्हातय् लाःगु खः । इमिसं आः ‘कामचलाउ सरकार’ दयेकूगु दुसा मेगु आपालं ज्यात अन्यौल खनेदूगु दु ।

Categorized in अन्तर्राष्ट्रिय