coved ad

तालिवानं अफगानिस्तानया खानी चीनयात लःल्हाइगु !

नेवा: अनलाइन न्युज – ललेन्द्र शाक्य | २०७८ भाद्र १८, शुक्रबार १६:३०:५२

तालिवानं धाल, ‘चीन जिमिगु महत्वपूर्ण साझेदार मुलुक खः’

आः अफगानिस्तानय् तालिवानं मिसापिन्त विश्वविद्यालयस ब्वंकेगु अनुमति बिइगु, नर्स व प्रहरीइ नं ज्या याकेबिइगु तर मिसापिन्त छुं नं मन्त्रालयया जिम्मेवारी धाःसा मबिइगु । 

तालिवानया प्रवक्ता जबिउल्लाह मुजाहिदं चीन थःपिनिगु दकले महत्वपूर्ण साझेदार मुलुक जूगु धाःगु दु । मुजाहिदं आः अफगानिस्तानया आर्थिक भविष्य चीनया ल्हातय् दूगु धाःगु दु । तालिवानं चीनयात युद्धग्रस्त मुलुकया पुनःनिर्माणया नितिं आग्रह याःगु दु ।

बिहिवाः सार्वजनिक जूगु छगू अन्तर्वार्ताय् मुजाहिदं धाःगु दु, ‘चीन जिमिगु दकले महत्वपूर्ण साझेदार मुलुक खः । जिमिगु नितिं चीनं अवसर बिइत वनाच्वंगु दु । चीन अफगानिस्तानय् लगानी व निर्माणया नितिं तयार दु ।’

३१ अगष्टनिसें अफगानिस्तानपाखें फुक्क विदेशी सैनिक लिहाँ वनेधुंकूगु दु व तालिवानं सरकार दयेकेगु प्रक्रिया न्ह्याकूगु दु । आः अफगानिस्तान आर्थिक व खाद्य संकटया सामना यानाच्वंगु दु ।

मुजाहिदं चीनया न्यू सिल्क रोडपाखें अफगानिस्तानयात फाइदा जुइगु धाःगु दु । वं धाःगु दु, ‘न्यू सिल्क रोड वा वान बेल्ट वान रोडं चीन, अफ्रिका, एसिया व युरोपयात स्वाइ । थ्व ज्याझ्वलय् बन्दरगाह, रेल्वे, सतक व औद्योगिक पार्क जुइ ।’

अफगानिस्तानय् तामाया तःधंगु भण्डार दु व अफगानिस्तानया थ्व खानी तालिवानं चीनयात लःल्हायेफु । मुजाहिदं चीनं अफगानिस्तानया खानीयात आधुनिकीकरण याइगु धाःगु दु ।

मुजाहिदं मिसायात विश्वविद्यालयस ब्वंकेगु अनुमति जुइगु, नर्स व प्रहरीइ नं ज्या यायेफइगु धाःगु दु । अय्सां वं मिसापिन्त छुं नं मन्त्रालयया जिम्मेवारी धाःसा मबिइगु धाःगु दु । 

तालिवानं रुसलिसे नं थःपिनिगु राजनीतिक व आर्थिक स्वापू दूगु धाःगु दु । मुजाहिदं रुसं शान्ति सम्झौताया नितिं मध्यस्थता याःगु व शान्ति वार्ताय् वं महत्वं जाःगु भूमिका निर्वाह याःगु धाःगु दु ।

Categorized in अन्तर्राष्ट्रिय