Mohanai 2078 KTM

तां तःलय् गथे लात एयर इण्डियाया विमान

नेवा: अनलाइन न्युज – ललेन्द्र शाक्य | २०७८ आश्विन २०, बुधबार ११:२४:१२

छिं हवाईजहाज सर्गतय् ब्वःगु व रनवे दुने जक खंगु जुइ । तर गनं छुं तां (पुल) तःलय् फसेजूगु ला पक्का नं खंगु मदुनि जुइ । ततर भारतया राजधानी न्हूदिल्लीइ छगः विमान तां तःलय् फसेजूगु भिडियो भाइरल जूगु दु ।

भारतया राष्ट्रिय ध्वजाबाहक एयर इण्डियाया विमान दिल्ली गुरगांया राजमार्गया छगू ओभर हेड ब्रिज आकाशे तां क्वय् फसेजूगु खः ।

थ्व स्क्रेप्ड अर्थात् कवाड जुइधुंकूगु जहाज खः व एयर इण्डियालिसे थुकिया सम्बन्ध आः मदु । मिइधुंकूगु उगु विमानयात इन्दिरा गान्धी अन्तर्राष्टिय विमानस्थलं गनं यंकेगु झ्वलय् आकाशे तां क्वय् फसेजूगु खः ।

भारतया छम्ह पत्रकार अशोक राजं ट्वीटरय् सार्वजनिक याःगु भिडियोय् उगु जहाजया पंखा खनेमदु । उकिया लिक्कपाखें गाडीत वयेवने यानाच्वंगु खनेदु ।

थ्व भिडियो ट्वीटर व यूट्युबय् द्वलंद्वः मनूतसें स्वःगु दु । भिडियो स्वःपिनसं थीथी प्रतिक्रिया नं पोष्ट याःगु दु । गुलिसिनं थ्व विमान गुकथं फसेजुल धकाः जिज्ञाखा तःगु दुसा गुलिंसिनं विमान यंके न्ह्यः उकिया रुट बांलाक्क जाँच यायेमाःगुु धाःगु दु ।

अथेहे, गुलिंसिनं धाःसा थ्व घटनायात पश्चिम बंगालय् सन् २०१९ या घटनालिसे तुलना नं याःगु दु । उगु इलय् नं छगः कवाडी विमान तां क्वय् फसेजूगु खः ।

मेगु छगू ट्वीटर छ्यलाबुला याइम्हेस्यां विमान लरीइ लोड यानाः यंकाच्वंगु भिडियो पोष्ट यासें उगु घटना ३ अक्टोबरया जूगु धाःगु दु ।

Categorized in अन्तर्राष्ट्रिय