prabhu baink new

तसकं मेहनत तुल बुँख्याःया छोय्ला बजि दयेकेत : म्यूजिक भिडियो अडिटर राजेश शाक्य

नेवा: अनलाइन न्युज – ललेन्द्र शाक्य | २०७७ भाद्र १४, आइतबार १६:१३:०१

बुँख्याः ब्याण्डया ...छोय्ला बजि...म्ये वइगु ने.सं. ११४० ञँलाथ्व चतुर्दशी (भाद्र १६ गते) सेप्टेम्बर १ तारिख मंगलवाः इन्द्रजात्राया दिं बुँख्याः ब्याण्डया यूट्युव च्यानलपाखें सार्वजनिक जुइ ।

ललेन्द्र शाक्य

किपू नगरपालिका १० वडाया छम्ह नांजाःम्ह क्यामेरा पर्सन लिसें भिडियो अडिटर राजेश शाक्यं थःगु भिडियो एडिटिंगया ख्यलय् दकले न्हापांगुखुसि न्हूगु अनुभव कथं नेवाः मेटल संगीतया म्यूजिक भिडियो एडिटिंग यानादीगु दु ।

किपूया बुँख्याः ब्याण्डया ...छोय्ला बजि...नये हे माः...बोलया नेवाः मेटल म्येया म्यूजिक भिडियोया एडिटिंगया भाला भाजु राजेश शाक्यं कयादीगु खः । किपूया बुँख्याः ब्याण्डया थुगु ...छोय्ला बजि...नये हे माः...बोलया नेवाः मेटल म्ये नेपालभाषा संगीत ख्यलय् दकले न्हापांगु नेवाः मेटल म्ये कथं काःगु दु । थ्व ल्याखं थुगु म्ये नेपालभाषा संगीत ख्यःया नितिं दकले न्हापांगु ऐतिहासिक पलाः व कुतःया रुपं पिदंगु दु ।

भाजु राजेश शाक्यं थुगु ...छोय्ला बजि...नये हे माः...नेवाः मेटल म्येया एडिटिंग जक मखु, थुगु म्येया म्यूजिक भिडियोया कलर करेक्सनलिसें आकर्षक एनिमेशनया ज्या नं यानादीगु दु ।

भाजु शाक्यं थुगु नेवाः मेटल म्ये दयेकेगु ज्या न्हापांगुखुसि यानागु खँ कनादिसें धयादी, मेमेगु म्येया म्यूजिक भिडियो सम्पादन यायेबलय् छन्हु न्हिच्छिं हे सिधयेकेगु खः । तर, बुँख्याः ब्याण्डया किजापिनिगु थुगु नेवाः मेटल म्ये दयेकेत आपालं ई काल । गर्व यानाः धायेगु खःसा बुँख्याः ब्याण्डया ...छोय्ला बजि...नये हे माः...दयेकेत तसकं तसकं आपालं हे ई काःगु दु ।

...छोय्ला बजि...नये हे माः...म्यूजिक भिडियोय् म्येनाप ल्वयेक कलर करेक्सन यानादीगु दु एडिटर भाजु राजेश शाक्यं । कलर करेक्सन यायेत नं अतिकं ई काःगु खँ न्ह्यथनादिसें भाजु शाक्यं धयादी, स्वंगः क्यामेराया फुटेजत दु । स्वंगः क्यामेराया फुटेजयात आवश्यकता कथं स्वानागु दु । मेहनत यानागु दु, मेहनतया फल अवश्यं कायेखनी धैगु जिगु विश्वास दु । उकिं बुँख्याः ब्याण्डया ...छोय्ला बजि... दकले न्हापांगु नेवाः मेटल म्ये सकल स्वकुमिपिन्सं अवश्यं य्येकाः दी, लोकं ह्वाकेत ग्वाहालि यानादी  ।

मेमेगु म्यूजिक भिडियो एडिटिंग यायेगु सिबें मेटल म्ये एडिटिंग यायेगुलि आपालं फरक दूगु विचाः प्वंकादीम्ह राजेश शाक्यं म्यूजिक बिट् कथं फुटेजत कटपेष्ट यायेबलय् अतिकं थाकुगु विचाः नं प्वंकादीगु दु । भाजु शाक्यं एडिटरयाके कलाकारिता व संगीतया ज्ञां मदुगु जूसा झन् हे थाकुइगु बिचाः नं प्वंकादीगु दु । खय्तला भाजु राजेश शाक्य छम्ह भिडियो एडिटर, क्यामेरा पर्सन जक मखु, छम्ह स्यल्लाःम्ह कलाकार निर्देशक नं खःसा संगीतप्रति नं अतिकं झुकाब दुम्ह कलाकःमि खः । थुलि जक मखु भाजु राजेश शाक्यं छम्ह बांलाःम्ह खोखो कासामिलिसें प्रशिक्षक व अन्तर्राष्ट्रिय रेफ्री नं खः ।

नेवाः परिवेशय् थौंकन्हय् ब्वलनाच्वंगु संस्कृति परम्परा दुनेया खायुगु सवाःया संस्कारयात ब्यंग्य नकाः छगू यथार्थ बाखंयात दुथ्याकातःगु बुँख्याः ब्याण्डया ...छोय्ला बजि...नये हे माः...नेवाः मेटल म्ये समग्र नेपालभाषा संगीत ख्यलय् हे दकले न्हापांगु नेवाः मेटल म्ये जुइत ताःलाःगु दुसा एडिटर राजेश शाक्यया नं दकले न्हापांगु न्हूगु अनुभवया ज्या कथं पिदंगु दु । धायेगु खःसा थुगु ...छोय्ला बजि...म्ये किपूया गौरव व शान जुइत ताःलाःगु दु । युवापुस्ता, उकी नं पाश्चात्य संगीतप्रति मोह दुपि, अझ नं मेटल संगीत यःपिनिगु दथुइ थ्व अवश्यं लोकं ह्वाइ, थुकी निगुमत मदु । थुगु म्येपाखें नेवाः भाषा त्वःताः वनाच्वंपिं थौंकन्हय्या न्हूगु युवापुस्तायात नेवाः भाषाप्रति नुगः क्वसायेकेगुलि नं आपालं भूमिका म्हिती धकाः धायेछिं ।

किपूया बुँख्याः ब्याण्डया ...छोय्ला बजि...म्यूजिक भिडियोया एडिटर, कलर करेक्टर लिसें एनिमेटर भाजु राजेश शाक्यं नं धयादी, थ्व म्ये किपूया सांगितिक इतिहासय् छगू इतिहासया पन्ना जुइत ताःलाःगु दुसा थुगु म्ये नेपालभाषा संगीत ख्यलय् छगू न्हूगु आयाम व न्हूगु प्रयोग खः, दकले न्हापांगु नेवाः मेटल म्ये खः । म्यूजिक भिडियोपाखें म्येयात जीवन्तता बियागु दु, तनावनाच्वंगु नेवाः परिवेशयात हाकनं छक्व म्वाकेगु पलाः छिनागु दु । स्वयादिसँ, कुं खिनादिसँ, थुगु म्ये व म्येया भिडियो छितः गथे ताल ?

बुँख्याः ब्याण्डया ...छोय्ला बजि...म्ये वइगु ने.सं. ११४० ञँलाथ्व चतुर्दशी (भाद्र १६ गते) सेप्टेम्बर १ तारिख मंगलवाः इन्द्रजात्राया दिं बुँख्याः ब्याण्डया यूट्युव च्यानलपाखें सार्वजनिक जुइ ।

Categorized in कला