zero media family planning adv

तरकारी बजारय् विचौलियापिनिगु लुटतन्त्र, सरकार मौन

नेवा: अनलाइन न्युज – ललेन्द्र शाक्य | २०७७ श्रावण १५, बिहिबार १५:२१:४१

विचौलियाया लाक्वपाक्व ब्यवहार : तरकारीया भां थिके जुल

लकडाउन चालेधुंकाः स्वनिगलय् उपभोक्तापिन्त अतिकं थाकुइगु कथं तरकारीया भाः थाहाँ वंगु दु ।

सरकारी निकायया ध्यान केन्द्रीत जुइमफुबलय् कोरोना महामारीपाखें व लकडाउनपाखें समस्याय् लाःपिं उपभोक्तापिन्सं न्हिथं नयेमाःगु तरकारी थिके जुइधुंकाः थप समस्याय् लाःगु दु ।

कोरोना महामारी, लकडाउन, वा वःगु व खुसिबाः चलःया बहाना तयाः विचौलियां तरकारीया मू छवाःया दुने हे दोब्बर थिकेयाःगु दु ।

केन्द्र सरकार व स्थानीय तहपाखें बजाः अनुगमन मजूबलय् तरकारीया भावय् विचौलिया व व्यापारीपिन्सं थःयत्थे लाक्वपाक्व ब्यवहार यायेगु ह्वःताः काःगु खः ।

वाउँगु तरकारीइ ५० प्रतिशत व सुक्खा तरकारीइ २० प्रतिशत मुनाफा आर्जन यायेफइगु प्रावधान जूसां नं व्यापारीपिन्सं थःयत्थे मूल्यवृद्धि याःगु खः ।

साउनया न्हापांगु वाः २० तका प्रतिकेजी जूगु तग्वःगु गोलभेडा निगूगु वालय् ४५ तका थ्यंगु खः । ५५ तका प्रतिकेजीया आलु आः ७० तका थ्यंगु दु ।

अथेहे, ४० तका प्रतिकेजीइ मियाच्वंगु काउली आः ११० तकां मियाच्वंगु दु । थथे तरकारीया मू आपालं थिकेजूसां नं नियमन निकाय धाःसा म्हुतुइ धौ फिनाः, मिखाय् पत्तिं चिनाः सुम्कं च्वनाच्वंगु दु ।

थुखे उपभोक्ता धाःसा थिके जूगु तरकारी न्यायेत बाध्य जुयाच्वंगु दु । स्थीर सरकारं तरकारीया मू नं व्यवस्थापन यायेमफूगु धासें इपिं रुष्ट जूगु दु ।

तच्वकं वाः वःगुलिसें स्वनिगः पिनेपाखें आयात यायेमाःगु जूगुलिं मू थिके जूगु व्यवसायीपिनिगु दाबी दु । व्यवसायी प्रतिस्पर्धा व तरकारी आयात म्हो जूगुलिं मूल्यस फरक जूगु व्यवसायीपिनिगु तर्क दु । छवाःया अन्तरालय् ४० निसें ५० प्रतिशत जक मूल्य वृद्धि जूगु धासें लुटतन्त्रया रुपं ब्याख्या मयायेत व्यापारी व विचौलियापिन्त आग्रह याःगु दु ।

लिपांगु इलय् थीथी थासं स्वनिगः थ्यंकीगु तरकारी बन्द जूगु मदु । मदिक्क बजारय् वाउँगु तरकारी वयाच्वंगु दु । तर व्यापारीपिं धाःसा ढुवानीइ हे समस्या जूगु हुनिं मूल्य बृद्धि यानाः मिइमाःगु धकाः धयाः वयाच्वंगु दु ।

Categorized in बजाः