coved ad

तत्काल हे लकडाउन मजुइगु

नेवा: अनलाइन न्युज – ललेन्द्र शाक्य | २०७८ पौष २७, मंगलबार १४:४१:२८

नेपालय् छवाः न्ह्यःनिसें न्हिथं २ प्रतिशतं कोरोना संक्रमणदर अप्वयाः वयेधुंकाः कोभिड १९ संकट व्यवस्थापन समिति (सीसीएमसीं) तत्काल हे लकडाउन मयायेगु तर संक्रमणया गति संकटपाखे वंसां स्मार्ट लकडाउनया कार्यविधि कथं कोरोना संक्रमण नियन्त्रणया व्यवस्थापन यायेगु तयारी यानागु जानकारी ब्यूगु दु ।

समितिया प्रवक्ता संगीता नेपालं व्यवस्थापन समितिया आइतवाःया निर्णय न्यंकूसें धाःगु दु, ‘आः लकडाउन यायेगु तयारी मदु तर संक्रमण अप्वल धाःसा थाय् स्वयाः स्मार्ट लकडाउन यायेफु ।’

प्रवक्ता नेपालया कथं छुं निश्चित जिल्लाय् जक कोरोना संक्रमित अप्वल धाःसा, संक्रमणया हुनिं मृत्युदर व अस्पताल भर्नादर अप्वल धाःसा वहे जिल्लाय् जक लकडाउन यायेगु प्रक्रिया खः स्मार्ट लकडाउन । थ्व लकडाउनया कार्यविधि कथं संक्रमण ल्याः, मृतयु ल्याः व अस्पताल भर्ना ल्याःयात सूचक कथं काइ । थुज्वःगु लकडाउनया नितिं स्थिति स्वयाः गृहमन्त्रालयं सम्बन्धित प्रमुख जिल्ला अधिकारीयात निर्देशन बिइमाः ।

आःया अवस्थाय् धाःसा स्मार्ट सरकारं कोभिड १९ उपचार व व्यवस्थापनया नीति अवलम्बन याःगु प्रवक्ता नेपालं धाःगु दु । आइतवाः च्वंगु समितिया बैठकं सार्वजनिक थासय् २५ म्हसिबें अप्वः जमघट जुइगु कथं सभा, समारोह, पर्व व धार्मिक क्रियाकलाप यायेमदइगु निर्णय याःगु दु ।

थ्व निर्णय कार्यान्वयनय् हयेत गृहमन्त्रालयपाखें फुक्क जिल्ला प्रशासनय् निर्देशन बिइधुंकूगु दु । गृहमन्त्रालयया निर्देशन लिपा थ्व निर्णय माघ ७ गतेनिसें कार्यान्वयनय् हइगु जूगु दु ।

(नागरिक न्हिपौ)

Categorized in पत्रपत्रिका