nepal investment baink

तःभुखाय् ११३५ ः कलाकःमिपिनि अनुभव

विजयरत्न असंबरे
२०७२ बैशाख १२ गते ब्वःगु तःभुखाचं नेपालय् आपालं क्षति यात । धन, जन व सम्पदाय् बांमलाक्क घाः लाकूगु उगु भुखाय् ब्वःगु नं निवाः फुइ धुंकल । तर अय्सां मनूतय्गु नुगलं आःतक नं भुखाय् चिले मफुनि । थ्वहे झ्वलय् थन नेवाः संकिपा ख्यःया थीथी कलाकःमिपिनिगु नुगलय् किनाच्वंगु भुखाय्या लुमन्तिया लू न्ह्यब्वयेगु कुतः याये ।

“जि ला दु नि जा जि नये सिधयेकाः नुसिला च्वनागु का । अबाय्ति हे छेँय् ला वारावार सना हल । घ्वाराघ्वारा सना हल । थ्व छु जूगु ? गपाय्सकं ुभखाय् ब्वःगु धकाः धाये न्ह्यः हे जिगु पुलांगु भ्वाथःगु छेँय ला घ्वाराघिरां मिंक दुनावन । जिमि छेँय् च्वंपिं छम्ह निम्ह ला पिनेतक बिस्युं वने नं लात । जि मवना । छेँय् हे च्वनाच्वना । वने हे मखु धकाः च्वनाच्वना । जितः जिम्ह छम्ह म्ह्याय्नं साथ बिल । जिमिसं छेँय् च्वच्वं हे पिने हालाहःगु ताल कि फलांम्हेसिगु छेँय् दुन । थ्वम्ह लात । अथेला जिपिं नं छेँय् नं पिहाँ वया ।” तःभुखाचं बिनाश याये धुंकाः थःगु छेँय् पिने ख्वपया महेश्वरी खेल मैदानय् छगू पालय बासं्र च्वनाच्वंम्ह देय्या नांजाःम्ह ख्यालःमि, संकिपामि व साहित्यकार रामशेखर नकःमिं थःगु भुखाय् लुमन्ति थुकथं न्ह्यब्वयादिल ।
भुखाय् ब्वःगु दिं शनिवार लाःगुलिं गुलिखे मनूत पिकनिकय् नं लानाच्वन । अज्याःगु हे छगू पिकनिकय् नेपालभाषाया न्हापांगु संकिपा “सिलु”या हिरो जय श्रेष्ठ नं लाःगु जुयाच्वन । वय्कलं दँय्दसं विक्रम संवत्कथंया न्हूदँ हनेगु निंतिं थुकथं पिकनिकया ग्वसाः ग्वया वयाच्वनादीगु जुयाच्वन । थुगुसी वय्कःया पिकनिकय् निर्देशक व कलाकार सुरेन्द्र तुलाधर नं वनेमाःगु जुयाच्वन । थः डायबिटिजया ल्वगि जूगुलिं न्ह्यःनेलाःगु नये मजिउ । उकिं छेँय् हे जा नये सिधयेकाः छगू जूसां वने मालिका धकाः वसः पुनाच्वंगु इलय् आकाझाकां भुखाय् ब्वःबले सात्तु हे वन धकाः सुरेन्द्र तुलाधरं कनादिल । सुरेन्द्र तुलाधरया छेँजः थौंकन्हे च्वनाच्वंगु स्वयम्भुया न्हू छेँय् भतिचा संगुबाःगु बाहेक मेगु छुं्र हे मजू तर वय्कःपिनि दोखादलय् च्वंगु पुलांग्ु छेँय् धाःसा भतिचा अप्वः हे स्यन धकाः वय्कलं कनादिल ।
भुखाय् ब्वःगु दिनय् पिकनिकय् लाःम्ह मेम्ह संकिपामि नविन जोशी खः । वय्कः ककनी पिकनिक हनाच्वंगु जुयाच्वनसा कलाकार व निर्देशक बासु शाही धाःसा थःगु लुभई जुयाच्वंगु  महालक्ष्मी जात्रा हनाच्वंगु जुयाच्वन । नेवाः संकिपा ख्यःया तसकं लोकंह्वाःपिं हिरोइनत भिन्तुना जोशी व आशिष्मा नकःमि मध्ये भिन्तुना मय्जु भुखाय् ब्वः खुनु थःगु हे छेँय् हे दुगु जुयाच्वन । “ओहो ! भुखाय् ब्वयाः जिमिगु छेँ थुलि संकल कि धयां साध्य हे मजू । अझ उलि जक ला जि ला पिहाँ वयेगु लुखा हे बन्द जुइक छु छु कुतुं वयाः लात । बल्ल बल्ल तिनि पिहाँ वया । ज्यान बचे जुल । तर मां (नगिना जोशी) धाःसा ब्वाँय्ब्वाँय् वःबले दयाः घाःपाः जुल ।” भिन्तुनामय्जुं थःगु भुखाय् थुकथं कनादिलसा लोकंह्वाःम्ह मेम्ह हिरोइन आशिष्मा नकःमिमय्जु उखुनु थः स्वम्हं तःकेहेँपिं बलम्बुइ थः अजि बाज्या व निनि नाप लायेत वंगु जुयाच्वन । अन जा नये सिधयेकाः गफ यानाच्वंगु इलय् आकाझाकां भुखाय् ब्वःबले काचाकाचां छगू हे टेबुलया क्वय् च्वं वनागु खँ कनादिल ।
“तीतो सत्य”या बिजुली धकाः बय्बय् जूम्ह मञ्जु श्रेष्ठ उखुनु छेँय् दुगु जुयाच्वन । जा नये सिधयेकाः भतिचा आराम काये धकाः मति तयाच्वंगु इलय् भुखाय् ब्वःगु जुयाच्वन सा “फय्गं”या निर्देशक व कलाकार सुरेश स्थापित यलय् च्वंगु वय्कःपिनिगु ज्याकुथी क्यामेराम्याननाप लानाः भतिचा ध्यबा बिइ धकाः वंगु जुयाच्वनसा अन थ्यंजक थ्यंगु जुयाच्वन । नेवाः संकिपा ख्यःया लोकंह्वाःम्ह मचा कलाकार नस्वाः जोशी शनिवार जूगुलिं छेँय् हे च्वनाच्वंगु जुयाच्वन सा वया अबु कलाकार रुमन जोशी भाजु त्यौडय् थःगु पसलय् च्वनाच्वंगु जुयाच्वन । भुखाय् ब्वयाः थःगु पसःया न्ह्यःनेसं व जवंखवं च्वंगु च्वंगु न्याखाखुखा छेँ घ्वाराघिरां दुनावल । नस्वाः जोशीया निंतिं भुखाय् धइगु हे दकलय् न्हापांगु अनुभूति जुयाच्वन । नस्वाः मय्जुं ला थःगु छेँ वारावारा संबले छु जूगु धकाः हे बिचाः याये मफुत खनि ।
“याँमिखा” व “बाखंचा”य् मू पात्र जुयाः म्हितूम्ह गोरखापत्रया सम्पादक पुष्कर माथेमा नं शनिवार जूगुलिं छेँय् हे दुगु जुयाच्वनसा वय्कःया म्ह्याय् छम्ह पाल्पाय् व काय् धुलिखेलय् लानाच्वंगु जुयाच्वन । भुखाय् ब्वये धुंकाः थः मस्तलिसे स्वापु मजूतले थःगु मन मच्वंगु खँ कनादिल । शनिवार जुल कि गुलिखे नूत पिकनिक वनी गुलिखे मनूत छेँजःपिंलिसे हे च्वनाः आराम याइ तर गुलिखे नेवाः फिल्म व नेवाः सिरियलया शुटिंग धाःसा शनिवार शनिवार लाकाः याइगु चलन दु । थज्याःगु हे छगू सिरियल “बाखंचा” नं खः । थ्व “बाखंचा”या निर्देशक राजु स्यस्यः खः । नेपालभाषां पिदंगु थीथी बाखनय् दयेका वयाच्वंगु “बाखंचा”य् थौंकन्हय् बाखंच्वमि मीना बज्राचार्यया “स्वाहाने” बाखनय् सिरियल दयेकाः क्यनावयाच्वंगु दु । थ्वहे “स्वाहाने”या शुटिंग नयाँबजार म्हय्पिइ च्वंगु बीरेन्द्र तुलाधरया छेँय् जुयाच्वंगु जुयाच्वन । उखुनुया शुटिंगय् सिर्जना महर्जन, सुष्मा महर्जन, लक्ष्मीकुमार महर्जन, उदेन न्हूसाय्मि, ज्ञानकुमार महर्जन व वीरेन्द्र महर्जनया नापनापं थुकी मेनरोल म्हिताच्वंम्ह शोभा बज्राचार्यं ब्वति कयाच्वंगु जुयाच्वन ।
भुखाय् ब्वयाः छेँ वारावारा संबले “बाखंचा”या कलाकारत ग्यानाः चिल्लाय्मिल्लाय् दनाः हाःगु खँ निर्देशक राजु स्यस्यभाजुृं कनादिलसा उखुनु क्षेत्रपाटी पार्टी प्यालेसय् नेवाः जागरण मञ्चया ग्वसालय् छगू ज्याझ्वः दुगुलिं “बाखंचा”या छम्ह मू मनू उमेश स्थापित उखेपाखे हे लातसा क्षेत्रपाटी पार्टी प्यालेसय् दुपिं मेपिं संकिपामि मध्ये रवि महर्जन, रत्नकाजी लूनिभाः नं खः । थ्व च्वमि नं उगु इलय् अन क्षेत्रपाटी पार्टी प्यालेसय् दुगु खःसा भुखाय्या प्रत्यक्ष अन हे च्वना यानागु खः । भुखाचं क्षेत्रपाटीया छखाच छेँ दुना वःगु खन । अले अन हे च्वच्वं धरहरा क्वःदःगु फोटो नं फेसबुकय् खना । जिगु ला नुगः हे च्येंच्यें मिनावल । थःगु छेँ व छेँजः लुमनावल । फोन यानां लगे हे मजू । बल्ल बल्ल लगे जुल । अले तिनि भतिचा मन याउँल । तर थःगु नं छेँ पुलांगु जूगुलिं मन उलि याउँके मफुत । कन्हय् खुनु तिनि छेँय् स्वः वना । छेँय् ला लिउने दुनावल खनिं ।