zero media family planning adv

तःभुखाय् ११३५

- रत्नकाजी मन
नेपाः देय्या लाय्कू अति झःझः धाःगु
हलिंया हे नुगः अतिकनं साला काःगु
स्वयम्भु, पशुपति, येँ, यल, ख्वप, किपु
नेवाः कलाकृतिं विश्वय् हे नां जाःगु ।१।

उत्तरस हिमालय दक्षिण तराई बांलाःगु
दथुस स्वनिगः सकसियां नुगः जुयाच्वंगु
देगः फल्चा ल्वहंहितिं तजिलजि पिब्वःगु
प्रकृति नं अतिकनं स्वनिगःया यइपुगु ।२।

गोपाल, महिष, लिच्छवी, मल्लं शासन याःगु
समुन्नत नेपाः खनाः शाह जुजुं त्याकूगु
न्ह्यानावंगु ईलिसें जनता जागृत जुयावःगु
न्हूगु नेपाः दयेके धकाः सकलें जानाच्वंगु ।३।

नेपालीय संवत् झिंछसः व स्वीन्यागू
बछलाथ्वया सप्तमि शनिवार उखुनु
सुथसिया झिंछता व न्यय्खुगू मिनेट वंगु
सकसियां नुगः खाक्क भुखाय् ब्वःगु ।४।

गोरखाया बारपाक केन्द्रविन्दु जूगु
न्हस फुति च्याया ल्याः रेक्टरय् क्यंगु
अतिकनं प्रभावित झिंप्यंगू जिल्ला जूगु
लिच्वः लाकल मेमेगु जिल्लाय् सुइगुंगू ।५।

येँ देय्या म्हसीका विश्वया सम्पदा जुयाच्वंगु
स्यंकल पशुपति, बौद्ध, स्वयम्भु व थीथी लाय्कू
च्याद्वलं मल्याक मनूया जीवन हे काःगु
लखंलख मनूतय्त सतक बाय् याःगु ।६।

द्वलंद्वल मनूत स्व घाःपाः नं जूगु
नये, पुने, च्वनेया थागाः मदुगु
ब्वलब्वल भुखाय् धाधां कय्कय् कुंगु
सुरक्षित जुइगु छेँत घ्वारारारां दुंगु ।७।

हाहाकार नेपाःमिया नुगलय् थ्यंक जूगु
नेपाः सरकार गन दु नेपाःमिं मखंगु
ध्वस्त जुल गामंगां हे नुगः सकसियां ख्वःगु
राहत हँ चाउचाउ बिस्कुट सरकारं बीगु ।८।

चकंगु नुगःत जानाः उद्धार व राहतय् जाःगु
नेवाःत जानाः राहत अभियान हे न्ह्याकूगु
झी भिंचितामिपिसं फुचाः ग्वाहालि याःगु
नेपाःया फुक्क सुरक्षाकःमि उद्धारय् जाःगु ।९।

‘धाये बलय् अःपु धरःग्वारा तःपु’
ल्हाना बिल भुखाचं थुगु धापु
सकसिया म्हुतुइ धरःग्वारा थाःगु
येँ देय्या तःजिगु सम्पदा खः छगू ।१०।

चःमति बुँ फाँट बस्ती न्हूगु जूगु
स्यंकल अन नं भुखाचं ग्यानापुगु
लुति अजिमा देगःया गजू दुंगु
कंग अजिमाया ल्वहंथां ग्वारातूगु ।११।

मजाः देगः, गुतपौ, कृष्ण देगः दुंगु
दशावतार क्यनीगु देगः दुनावंगु
छमा सिमां दयेकातःगु इतिहास दुगु
भुतिसः नं दुनावना यक्व मनू ल्हाःगु ।१२।

कागेश्वर देगः विशिष्ट महत्व दुगु
सिलुया लख हयाः छाये हइगु
दुनावन व नं शैली ल्वाकज्याःगु
दुना वन छेँ नं नगरा तइगु ।१३।

स्वःस्वःथाय् हरे हाहाकार जूगु
नेपाःमिया दुखं हरे विश्व हे झू चाःगु
मजुइमा हाकनं विपत्ति थुज्वःगु
सकसिया नुगलं–म्हुतुं थ्वहे थ्वःगु ।१४।

विपित्त थ्व नेपाःमिया अतिकं तच्वःगु
शक्तिइ हिकाः नेपाः दयेकेनु न्हूगु
सचेत थःपिं जुयाः भिंकेनु फुक्क स्यंगु
विश्वया न्ह्यःने दसु जुयाः क्यनेनु ।१५।

तःभुखाय् अति निर्दयी खः थुगु
भविष्यय् सचेत जुया च्वनेनु
महल दयेकेगु मखु ततःजाःगु
छेँ दने भुखाचं सुरक्षित जुइगु ।१६।