nepal investment baink

तःभुखाय् लिपा नेवाः संचारकःमिपिनि भूमिका

सुरेश किरण

– सुरेश किरण

नेवाः संचारकःमि धकाः हे पिहां वयेगु स्थिति थ्यंकः वःगु मदुनि । भुखाय् ब्वयाः पीडित जूपिं सकल नेपाःमि खः । अय्नं थ्व भुखाय् ब्वयाः क्षति जूगु नेवाःतय् गां, बस्तीया मौलिक म्हसीकायात गुकथं ल्यंका तयेगु धइगु खँय् नेवाः पत्रकारतयसं नं थःथःगु कथं ध्यान बियाः ज्या यायेमाःगु खनेदु ।

सक्व दे छगुलिं हे ध्वस्त जूगु दु । आः अन पुनःनिर्माणया ज्या जुल धाःसा झीगु म्हसीका ल्यंका तये फइ कि मफइ थ्व खँय् झीसं बिचाः यायेमाः । सक्व देयया म्हसीका न्हापा गुकथं दु उकथं हे दयेमाः धइगु ल्याखं झीसं थःगु कथं प्रचारप्रसार यायेमाःगु खनेदु ।

अथेहे सरकारपाखें भुखाचं पीडितपिंत बीत्यंगु राहत नेवाःतय् दथुइ नं गथे यानाः थ्यंकेगु व खँय् नं ध्यान बीमाःगु दु । सरकारं ब्यूगु राहतया गाक्क प्रचारप्रसार यायेगु व पीडित नेवाःतय्सं उगु राहत गुकथं कायेकेफइ धइगु खँय् बः बीमाः । थुकिया निंतिं संचारख्यःया लिसें नेपालमण्डल राहत अभियानं नं ज्या यायेमाः । झी दाजुकिजापिं अप्वः अंशवण्डा मजूगु स्थितिइ दयाच्वनी, अंशवण्डाया खँय् ल्वापुख्यापु दयाच्वनी, थ्व स्थितिइ भुखाय् ब्वयाः पाःताः जूगु छेँया पुनःनिर्माण यायेबलय् थुकथंया ल्वापुख्यापु गुकथं ज्यंकेगु थ्व खँय् नं झीसं बिचाः यायेमाः ।

अप्वः धयाथें नेवाःत सोझापिं जूगुलिं राहतया खँय् उलि च्यूताः तयाच्वनी मखु । उकिं सरकारं ब्यूगु राहत थ्व थ्व दु, थुकथं कायेमाली आदि इत्यादि खँय् जाग्रृत ला याये हे माः । मखुसा, हानं नं नेवाःत द्यापं च्वनेमालेफु । मेता खँ, न्हाच नं धायेधुन, भुखाचं नष्ट जूगु नेवाः बस्ती, नेवाः सम्पदाया पहिचान मतनि कथंया पुनःनिर्माण यायेगु निंतिं थुकिया प्रचारप्रसारया लिसें नेवाःत फुक्क जानाः न्ह्यायेमाःगु खनेदु । संचारकःमितय् नं भुखाय् लिपा थःथःगु हे समस्या दु । सन्ध्याटाइम्स न्हिपौ नं वंगु आइतवाःनिसें तिनि पिदंगु दु । भुखाचं पीडित छुं नं संचारकःमि दुसा इमित नं झीत फूचाःगु ग्वाहालि थ्व इलय् यायेमाः ।

(तःभुखाय् लिपा नेवाः संचारकःमिपिनि भूमिका छु जुइफु धइगु सम्बन्धय् नेपालभाषाया न्हिपौ सन्ध्याटाइम्सया सम्पादकभाजु सुरेश किरणलिसे जूगु खँल्हाबल्हाय् आधारित)