prabhu baink new

तःभुखाया इलय् फुकथं ग्वहालि यानाःगु दुः अनुपमान महर्जन

(अनुपमान महर्जन, थौंकन्हय् नेपाः झायाच्वनादीगु दु । वय्कः १२ दँ न्ह्यःनिसें अष्ट्रेलिया च्वनाः वयाच्वनादीम्ह खः । वय्कःया छेँ येँया लगं त्वाः खः । वय्कः गुथि अष्ट्रेलियाया जनरल सेक्रेटरी खः । थ्वया न्हापां वय्कलं गुथि अष्ट्रेलियाया ल्याःचाः स्वयेगु ज्या यानाः वयाच्वनादीगु खः । वय्कलं अष्ट्रेलिया व नेपालय् प्रोफाउण्ड सर्भिस चायेकाः अष्ट्रेलियाय् ब्वं वनीपिं विद्यार्थीपिन्त ग्वाहालि यानाच्वनादीगु दु । थौंकन्हय् वय्कलं अष्ट्रेलियाय् माइग्रेशन ल ब्वनाच्वनादीगु दु ।)

अनुप जु, ग्वदँ दत छि अष्ट्रेलियाय् च्वनादियागु ?

१२ दँ न्ह्यः जि अध्ययनया सिलसिलाय् अष्ट्रेलियाय् वनागु खः । जि सुरुइ बिजनेश कलेजपाखें ब्वनेगु नितिं अष्ट्रेलिया वना । लिपा अन जिं सीपिए क्वचायेकाः जिगु पेशागत रुपं एकाउण्टेन खःसां नं आः चाहिँ जि अष्ट्रेलियाय् माइग्रेसन ल कोर्ष यानाच्वनागु दु ।

अध्ययन बाहेक अष्ट्रेलियाय् च्वनाः नेवाः संस्कृति व नेपाःया म्हसीका ल्यंकातयेगु नितिं गुलि ग्वाहालि यानाच्वनादिया ?

गुथि अष्ट्रेलियाय् च्वनाः दँय्दसं नेवाःतय्गु म्हपूजा, मोहनीया लसताय् भुतुमाली ब्वयेकेगु, नेवाः संकिपात अष्ट्रेलियाय् क्यनेगु, नेपालय् जूगु दैवी प्रकोपयात ग्वाहालि यायेगु ज्या यानाः च्वनागु दु ।

आकनं गुथि अष्ट्रेलियाय् छु पदय् च्वनादियागु दु ?

आः जि जनलर सेक्रेटरीइ च्वनाः ज्या यानाच्वना गुथि अष्ट्रेलियाय् । थ्वसिबें न्ह्यः जि झिदँतक ट्रेजर पदय् च्वनाः दांया कालबिल फुक्कं स्वयाच्वनागु खः ।

छिक्पिन्सं दैवी प्रकोपय् ग्वाहालि यानादिया धयादिल, नेपालय् ब्वःगु भुखाय् लिपा छिक्पिन्सं गुज्वःगु ग्वाहालि यानादिया ?

नेपालय् भुखाय् ब्वयेधुंकाः जिपिं अष्ट्रेलियाय् च्वनाः च्वनापिं फुक्क मिले जुयाः गुथि अष्ट्रेलियाया फुक्क दुजःपिन्सं थःम्ह फूगु दां मुंकाः नेपालय् भुखाय् नं यानाः तत्कालीन नये–त्वने यायेत व च्वनेत थाय् मदुपिन्त नये–त्वनेगु व च्वनेगु व्यवस्था याना । नापनापं अष्ट्रेलियाय् च्वनाच्वंपिं मेपिं नेपाःमिपिन्सं गुथि अष्ट्रेलियायात बिश्वास यानाः थप दां व वासः, जिन्सी सामानत, ५०,००० डलरसिबें अप्वः मुंकेगु यानाः । अनं लिपा नेपालय्, सक्व, बुंगमति, ख्वना, जल, लुभू, सिन्धुपाल्चोक, ख्वप, गोरखा, दोल्खानापंया थीथी थासय् सोलार मत, च्वनेगु नितिं टहरा, वासः, खाद्यान्न इनेगु ज्या याना ।

थुगु ज्या आकनं भुखाय् ब्वयेधुंकाः नेपाः झाया छिं स्वयमं हे ग्वाहालि यानादियागु खः ला ?

मखु, भुखाय् ब्वयेधुंकाः जिपिं अष्ट्रेलियाय् वासः मुंकेगु, ग्वाहालि मुंकेगुलि व्यस्त जुल । तर, यक्व दँ अष्ट्रेलियाय् च्वनाः गुथि अष्ट्रेलियाया लिक्क लाःम्ह व विश्वास दुम्ह गंगाबहादुर नेम्कुल दूगु जुयाः गुथि अष्ट्रेलियाया संस्थापक दुजःपिन्सं निर्णय यानाः वय्कःया जिम्माय् जिमिसं नेपालय् भुखाचं पीडितपिन्त ग्वाहालि यायेगु ज्या यानागु खः ।

आकनं आः ला नेपाः झाया च्वनादीगु दु । वय्कः नेम्कुलं यानादीगु ज्याप्रति छिगु नुगः खँ छु दु ले ?

अँ...जिं नेम्कुलया ज्या नेपालय् स्वया, जितः जक मखु फुक्क गुथि अष्ट्रेलियाया जः दुजःपिन्त चित्त बुझे जू ।

आः चाहिँ छि नेपालय् दु, नेपालय् गुगु ज्याया नितिं झायागु खः ?

जि नेपालय् वयागु धैगु थःगु हे व्यवसाय बृद्धि यायेगु नितिं नेपाः वयागु खः । जिं माइग्रेसन ल ब्वनाच्वनागु जुयाः झी नेपाःया न्हूगु पुस्ता अष्ट्रेलियाय् ब्वं वनेगु नितिं ग्वाहालि यायेगु नापं पाय्छिगु सल्लाह सुझाव बिइगु जिगु आज्जु खः । उकिया नितिं जिं बागबजारय् प्रोफाउण्ड नांया छगू व्यवसाय दर्ता यानागु दु । थुगु संस्थाया आज्जु धैगु हे अष्ट्रेलियाय् ब्वं वने चाहे जूपिन्त खःगु लँपु व बांलाःगु कलेज ल्ययाः बिइगु खः ।

थुकिया बाहेक नेपाःया नितिं मेगु छुं ग्वाहालि यानादियागु दु ला थें ?

अँ...दु, झीगु मांभाय् नेवाः भाय् ब्वंकेगु ब्वनेकुथि (स्कुल) मध्ये न्हूगु चाःगु लुभू नेवाः स्कुलयात फर्निचरलिसें स्कुलया अफिसया नितिं माःगु हलंज्वलंत प्रोफाउण्ड सर्भिसया हे मार्फत चूलाकाः बियागु दु । छाय्धाःसा थ्व मांभाय् ब्वंकीगु स्कुल खः । न्हूगु स्कुल जूगुलिं ग्वाहालिया आवश्कता खनेदूगुलिं जिं थथे ग्वाहालि यानागु खः ।

अनुप जु, दकले लिपा, नेपालं अष्ट्रेलिया ब्वं वने चाहेजूपिन्सं छितः स्वापू तयेमाल धाःसा गुकथं गन नापलाये खनी ?

जितः स्वापू तयेगु खःसा फेसबुकय् जिगु प्रोफाइल ‘अनुपमान महर्जन’ नामं चायेकाः तयागु दु । अझ बांलाक ध्वाथुइक थुगु विषयस जानकारी कायेत येँया बागबजारय् च्वंगु प्रोफाउण्ड सर्भिसय् झासँ । प्रोफाउण्ड सर्भिसया फोन ल्याः ०१–४२२७५३१ स स्वापू तयादिसँ ।